"Hələ ki sponsorumuz yoxdu. Sadəcə, klubun yarandığı Mamustanın kənd bələdiyyəsi bizə yardım edir. Həmçinin Lənkəran şəhər İcra Hakimiyyətinin başçısı Taleh müəllim bizi yüksək səviyyədə qəbul etdi və həmişə bölgədə futbolun inkişafına dəstək olacağını bildirdi. AFFA da digər klublara verdiyi dəstəyi bizə də verəcək. Sadəcə, bizdən bu işi şəffaf aparmağımızı istədilər. Bu yolda komandamızın yanında olan, heç vaxt dəstəyini əsirgəməyən federasiyaya, rayon icra başçısına və kənd bələdiyyəsinə təşəkkür edirəm. Komandaya 40-a yaxın futbolçu götürmüşük. 16 yaşlılardan ibarət kollektivimiz də var. Orda da 22 nəfər oyunçu yer alır. Uşaqlar təmənnasız gəlib məşq edirlər. Özləri ciblərindən pul qoyurlar. Çünki məqsədimiz Lənkəranımıza futbolu yenidən qaytarmaqdı. Bu mövsüm də hədəfimiz Region Liqasının çempionu olmaqdı. İnşallah, bu yolda mən və keçmiş polis işçisi, həmçinin də "Xətai" futbol klubunun təsisçisi, "Lənkəran"ın prezidenti Rəhman müəllimlə birlikdə əlimizdən gələni edəcəyik".