İcra başçısı “Turan Tovuz”a dəstək verəcək - AÇIQLAMA
“Turan Tovuz”un Müşahidə Şurasının sədri Oqtay Abdullayev bugünlərdə rayonun icra başçısı Məmməd Məmmədovla görüşüb. Bu haqda bilgini Abdullayevdən aldıq.
Görüş zamanı icra başçısı növbəti mövsümdən premyer-liqada çıxış edəcək komandaya hərtərəfli dəstək olacağını söyləyib:
“Məmməd müəllimlə görüşdə “Turan Tovuz”un yeni mövsümlə bağlı planlarını müzakirə etdik. İcra başçısı komamdanın uğurlu çıxışı üçün lazımi köməyi göstərəcəyini bildirdi. Bundan başqa, Qaraxanlı stadionu ilə bağlı məsələnin həllində yardımçı oldu. Plana əsasən, istəyirik ki, 2022/23 “futbol ili”ndə əvəzedici heyətimiz və müxtəlif yaş qrupları üzrə komandalarımız öz oyunlarını adını qeyd etdiyim stadionda keçirsin. Həmin arena Təhsil Şöbəsinin balansındadı. Məmməd müəllim ora ilə əlaqə saxlayıb, bu işdə şöbənin kluba kömək etməsini istədi. Onun zəngindən sonra məsələ həllini tapdı və bugünlərdə Təhsil Şöbəsi ilə klub arasında müqavilə bağlanacaq. Bundan başqa, icra başçısı rayon və kəndlərdə klubun reklam lövhələrinin yerləşdirilməsinə göstəriş verib”.
Abdullayev rayon rəhbərinin kluba da yardım edəcəyini söylədi:
“İcra başçısı komandanın qidalanması məsələsində yardım edəcəyini vurğuladı. Söhbət zamanı onu da qeyd etdi ki, Tovuzun iş adamlarını da “Turan Tovuz”a yardım etməyə dəvət edəcək, komandanın premyer-liqada Tovuzun futbol ənənəsinə layiq çıxış etməsinə çalışacaq”.
Sonda Müşahidə Şurasının rəhbəri Tovuz şəhər stadionunun süni örtüyünün dəyişdirilməsinə başlanıldığını da söylədi.
