Ötən il dekabrın 30-da Barselonadakı gecə klubunda 23 yaşlı qıza təcavüz etməkdə ittiham olunan Daniel Alveş çox götür-qoydan sonra yalan ifadələr verdiyini etiraf etmişdi.

Braziliya yığmasının 39 yaşlı sabiq müdafiəçisi artıq 5 aydı azadlığını itirib. O, hələ də günahsız olduğunu deyir.

"Football-plus.az" xatırladır ki, yanvarın 20-də həbs olunan Danielin vəkillərinin fevralda girov qoymaqla zaminə buraxılmaq tələbi rədd edilmişdi.

Onlar bugünlərdə növbəti şikayətinə rədd cavabı alıblar. Hüquqşünasları futbolçunun keçmiş həyat yoldaşı Dinora Santananın və onunla nigahından doğulan iki uşağının Barselona şəhərində qeydiyyatda olduqlarını, onlarla ailə əlaqələrinin müəyyən dərəcədə davam etdiyini əsas gətirərək, Danielin İspaniyadan başqa ölkəyə qaçmaq riskinin olmadığını iddia ediblər. Lakin məhkəmə bu əsasın inandırıcı olmadığı qənaətinə gəlib.

Vicdanım təmizdi
12 ilədək həbs olunmaq təhlükəsi ilə üzləşən səbəbkar isə məlum ittihamla üzləşəndən sonra ilk müsahibəsini verib. Dünya futbolunda 43 titul qazanmaqla argentinalı hücumçu Lionel Messi ilə birgə rekordçu olan braziliyalı İspaniyanın gündəlik “La Vanguardia” qəzetinə açıqlamasında günahsız olduğunu deyib.
* Mənim məlum hadisə haqda nə qədər düşünməyimdən asılı olmayaraq, həmin qızın tualetdən çıxandan sonra niyə ağladığını bilmirəm. Beynimə girən fikir odu ki, kimsə ona pis məsləhət verib. O, həmin məsləhətə qulaq asandan sonra özünü pis hiss edib və xaos vəziyyəti yaradıb. Ona görə ki, düşdüyü cəncəldən necə çıxacağını bilməyib. O, məni də cəncəl işə salıb.
* Onu vicdanına qulaq asmağa çağırıram. Həmin hadisədən sonra bir gecə də rahat yatmamışam. Mənim vicdanım təmizdi. Mən heç vaxt kiməsə öz istəyimlə ziyan vurmamışam.
* Onun vicdanının təmiz olub-olmadığını bilmirəm. Gecələr rahat yatıb-yatmadığını bilmirəm. Amma mən onu bağışlayıram.

Aramızda ehtiras yarandığı görünürdü

Alveş ötən ilin sonunda gecə klubunda baş verən hadisə ilə bağlı öz versiyasını da açıqlayıb.
* Bir müddət birlikdə rəqs etdik, bir-birimizə çox yaxın idik. Bir-birimizi öpməmişik, ancaq hərəkət və baxışlarımızdan aramızda ehtiras yarandığı görünürdü. Bəzi məqamlarda bir-birimizə çox yaxınlaşırdıq.
* Dostum Bruno daim qarşımızda dayanaraq şəklimizin çəkilməsinə imkan vermirdi. Biz ictimai yerdə idik. Ona görə də qıza tualetə getməyi təklif etdim. Ora birinci daxil olacağımı və onu gözləyəcəyimi dedim. Klubun yuxarı mərtəbəsində tək adam üçün boş yer yox idi. Hər şey göz qabağında idi. Mən isə ailəli olduğumdan istəyimizə orda çata bilməzdik.
* Tualetə birinci özüm getdim. Bir neçə dəqiqə sonra onun fikrini dəyişdiyini və ayaqyoluna gəlməyəcəyini düşündüm. Ona görə ki, qızdan ayrılandan sonra kifayət qədər vaxt keçmişdi. Tualetdən çıxanda onun artıq ora gəldiyini gördüm. Kənara çəkildim, o isə yanımdan keçib ayaqyoluna daxil oldu. Mən onun arxasınca ora getdim, hətta qapını bağlamadım. Brunonun bayırda məni gözlədiyini bilirdim. O, bizim hansı işlə məşğul olduğumuzu bildiyi üçün kimsənin tutaletə girməsinə imkan verməməyə çalışacaqdı.

Qıza qarşı heç bir zorakı hərəkət etməmişəm

Daniel təcavüz etdiyi iddia olunan 23 yaşlı qızla cinsi əlaqəyə girdiyini etiraf edib. Lakin o, bunun təcavüz olmadığını, əlaqənin qarşı tərəfin razılığı ilə baş verdiyini deyib. Həmin qıza qarşı zorakılıq və təhqir etməsi ilə bağlı iddianı qətiyyətlə rədd edib.
* Bunlar doğru deyil. Bu iddiaları onun vicdanına buraxıram. O, cinsi əlaqə zamanı məndən bir dəfə də dayanmağı xahiş etmədi. Tualeti tərk etmək istəyini bir dəfə də dilinə gətirmədi. Qapı açıq idi, gedə bilərdi, çünki mən, demək olar ki, əvvəldən axıradək unitazın üstündə oturmuşdum.
* Qızın barmaq izlərinin tualetin müxtəlif yerlərinə necə düşdüyünü bilmirəm. Mənim onu döşəməyə itələdiyim, vurduğum və təhqir etdiyim yalandı. Qıza qarşı heç bir zorakı hərəkət etməmişəm. Dizlərindəki sıyrıntı və cırmaq yerləri isə məni minet edərkən yaranıb. Guya mənim zorakı hərəkətlərimə məruz qaldığını iddia edir. Halbuki onun bədənində bir dənə də yara izi yoxdu.

Coananı itirməkdən çox qorxmuşam

Xatırladaq ki, Daniel prokurorluğa verdiyi ilk üç ifadədə həmin qızla cinsi əlaqədə olmadığını bildirmişdi. Məşhur futbolçu sonradan yalan danışdığını etiraf edib. O, bunu həyat yoldaşı Coana Sansa qarşı sədaqətsizliyini gizlətmək və onu qorumaq üçün etdiyini deyib. Alveş ondan boşanmaq istəyən Coananı hələ də sevdiyini bir daha vurğulayıb.
* Hər kim həyatında mənim kimi, heç olmasa, bir dəfə sevibsə, belə sevgini qorumaq üçün nə desən edə biləcəyini yaxşı anlayır. Bax, mən buna görə yalan danışmışam. Coananı itirməkdən çox qorxmuşam. Ona xəyanət edəndən sonra nigahımızı qorumaq uğrunda var qüvvəmlə mübarizə aparmışam. Bunu edərkən məni sonra hansı pis aqibətlərin gözləyəcəyinə məhəl qoymamışam.
* Həyat yoldaşıma həmin gecə baş verən hadisəni danışandan sonra ondan məni bağışlamasını istədim. Və hüquq-mühafizə orqanına növbəti, bu dəfə doğru ifadə vermək qərarına gəldim.
* Mənim son aylar yaşadıqlarım qorxulu yuxudu. Bu kabusun bir gün sona çatacağına ümid edirəm. Qarşısında üzr istəməli olduğum yeganə adam xanımım Coanadı.

Yeri gəlmişkən...

Coana məlum hadisədən az sonra Daniellə həyat yollarını ayırdığını bildirmişdi. İspaniyalı model qərarını “onu həmişə sevəcəyəm, amma özümə daha çox dəyər verir və hörmət edirəm” cümləsi ilə ifadə etmişdi.