Ötən il dekabrın 30-da Barselonadakı gecə klubunda bir qıza təcavüz etməkdə ittiham olunan Daniel Alveş çox götür-qoydan sonra yalan ifadələr verdiyini etiraf edib. Bu xəbəri İspaniya mənbələri yayıb.

“Football-plus.az” xəbər verir ki, yanvarın 20-də həbs olunan Braziliya yığmasının 39 yaşlı sabiq müdafiəçisi hadisə ilə bağlı verdiyi ilk ifadələrdə yalan danışdığını etiraf edib. O, öz istəyi ilə yenidən məhkəmə qarşısına çıxıb. 3 aydı həbsxanada olan və bir dəfə girov qoymaqla zaminə buraxılmaq tələbi rədd edilən Alveş həyat yoldaşı Jozanna Sansa qarşı sədaqətsizliyini gizlətmək və onu qorumaq üçün yalan danışdığını deyib. Sabiq futbolçu ondan boşanmaq istəyən Jozannanı hələ də sevdiyini vurğulayıb.

Daniel həmçinin təcavüz etdiyi iddia olunan 23 yaşlı qızla cinsi əlaqəyə girdiyini də etiraf edib. Lakin o, bunun təcavüz olmadığını, əlaqənin qarşı tərəfin razılığı ilə baş verdiyini deyib.

Xatırladaq ki, səbəbkar daha əvvəl verdiyi üç ifadədə həmin qızla cinsi əlaqədə olmadığını bildirmişdi. Növbəti dəfə məhkəmədən zaminə buraxılmasını tələb edən Alveşlə bağlı qərar hələlik verilməyib.