Ötən həftəsonu paytaxtımızda ''Formula-1'' üzrə növbəti qran-pri keçirildi. Bu dəfəki yarışda ilk iki pillə ''Red Bull''un pilotları - Serxio Peres ilə Maks Ferstappenə qismət oldu.

"Football-plus.az" xəbər verir ki, yarışı izləmək üçün paytaxtımıza gələn tanınmış simalardan biri də İvana Knoll oldu.

Təbii ki, xorvatiyalı top model 3,4 milyon izləyicisi olan ''instaqram'' səhifəsinin hekayə bölümündə Bakıda gördükləri ilə bağlı çoxlu paylaşımlar etdi. Təyyarədən, hava limanından, yarışın keçirildiyi şəhər yollarından birindən, eləcə də qaldığı oteldən şəkillər paylaşan Knoll akkreditasiyasını da göstərməyi unutmadı. 30 yaşlı xanım hətta yediyi qutabları, eləcə də paytaxtımızın gözəl yerlərində çəkdirdiyi şəkilləri də paylaşmağı lazım bildi.

Qeyd edək ki, İvana Knoll Qətərdə keçirilən son mundialda oyunlara açıq-saçıq geyimlərdə gəlməsi ilə populyarlıq qazanmışdı. Knoll 2016-cı ildə Xorvatiyada gözəllik müsabiqəsinin qalibi olub.