Fransanın gənclər yığmasında çıxış edən, hətta əsas yığmanın heyətində yoldaşlıq oyununa da çıxan Ussem Auar bundan sonra Əlcəzairin şərəfini qoruyacaq.

“Football-plus.az” xəbər verir ki, “Lion”un yarımmüdafiəçisi bu qərarı “instaqram” hesabında açıqlayıb. Nə baş verib?
Auar Lionda - əlcəzairli mühacirlərin ailəsində doğulub. Uzun müddət Didye Deşamdan dəvət gözləsə də, nəticədə yalnız ölkənin gənclər yığmasında bir neçə oyun keçirib və əsas yığma ilə bir oyuna çıxıb: 2020-də keçirilən Ukrayna ilə yoldaşlıq oyununda (7:1) iki məhsuldar ötürmə verib.
Əlcəzair yığmasının çalışdırıcısı Camel Belmadi hələ 2018-də onu dilə tuturdu ki, komandasına qoşulsun: “Yığmada işə başlayandan dərhal sonra onunla əlaqə saxladım. Ancaq belə gördüm ki, Ussem daim Fransa üçün oynamaq istəyib, bu qərarı çoxdan verib”.
2022-nin yayında futbolçunun fikri dəyişdi: məzuniyyətini Əlcəzairdə keçirən və 24 yaşını da orda qeyd edən Auar daha bir dəvət aldı – bu dəfə yerli federasiyadan. Və bu dəfə uzun-uzadı düşünəndən sonra razılıq verdi:

Ussem hətta bu seçimi daha əvvəl etmədiyinə görə kədərlənir: “Əlcəzair mənim üçün çox güclü bir hissin təmsilçisidi. Fransa yığmasında qaldığıma gör heyifsilənirəm”.

Ancaq yeni yığmada debütü gözləmək lazım gələcək: yaxınlarda zədəsini sağaldan Auar martın sonunda meydana çıxa bilmədi. Belmadinin komandası 2024-cü ildə keçiriləcək Afrika Kubokunun final mərhələsinə qatılmaq üçün Uqanda, Niger və Tanzaniya yığmaları ilə mübarizə aparır.
24 yaşlı yarımmüdafiəçi Avropa nəhənglərinin diqqətini hələ 2020-nin yayında çəkib. Həmin vaxt ona maraq göstərənlər arasında “Yuventus”, “Bavariya”, PSJ, xüsusən də “Arsenal” var idi. 2019/20 mövsümünü 9 qol, 10 məhsuldar ötürmə ilə başa vuran birinin belə maraq doğurması təbii idi. Parislilərin o vaxtkı idman direkoru Leonardo onu arzu adlanırırdı, “Arsenal” hətta 40+10 milyon avro təklif edirdi. Ancaq “Lion” belə hesab etdi ki, Auar daha bahadı, onu bu qiymətə satmağa dəyməz. Sonradan futbolçu özü də transferi baş tutmadığına görə məyus olmadığını bildirdi.

Əlcəzairli futbolçu həmin vaxtdan bəri kölgəyə çəkilib: bu mövsüm müntəzəm zədələnib, bir oyunu da tam keçirməyib. Məhsuldarlıqla bağlı da problem var: 10 oyunda yalnız 1 qol vurub və 1 məhsuldar ötürmə verib. Oyunun gedişində yorulduğu və səviyyəsinin aşağı düşdüyü açıq-aşkar görünür, adətən, 60-cı dəqiqədən sonra əvəzlənməsi də məhz bununla bağlıdı.

Çox güman, Auar bu yay “Lion”u havayı tərk edəcək. Ona ən real iddiaçı “Ayntraxt”dı. Almaniya klubu futbolçuya aylıq 250 min avro (ildə 3 milyon) maaş və 5 milyon avro imzapulu təklif edir. Futbolçu özü “Milan”a keçmək istəyir, agentindən danışıq aparmağı xahiş edib. Auar artıq dostlarına İtaliyaya köçmək fikrində olduğunu deyib. “Milan” isə hələ düşünr: Ussemin keçidi “Real”ın Braim Diasla bağlı qərarından asılı olacaq. İspaniyalı “Milan”da qalarsa, klub Auarla müqavilə bağlamayacaq.