Son mundialın finalında dramatik şəkildə Argentinaya uduzaraq ardıcıl 2-ci dəfə dünyanın ən güclüsü adını qazanmaq fürsətini əldən verən Fransa yığması ilə bağlı mühüm xəbərlər var.

Football-plus.az xəbər verir ki, ondan başlayaq ki, Didye Deşamın Fransa yığmasının baş məşqçisi postunda hələ ən azı dörd il də qalacağı rəsmi təsdiqini tapıb. Təcrübəli mütəxəssislə yeni müqavilə imzalanacağı haqda xəbərlər çoxdan dolaşırdı. Yanvarın 7-də Fransa Futbol Federasiyası (FFF) Deşamla 2026-cı ilin iyununa qədər nəzərdə tutulan yeni müqavilə imzaladı. Xatırladaq ki, 2003/04-də “Monako”nu ÇL-in finalına daşıyan, 2006/07-də “Yuventus”u B seriyasının, 2009/10-da isə “Marsel”i Liqa-1-in qalibi edən 54 yaşlı mütəxəssis Fransa yığmasını 2012-nin yayından çalışdırır. “Xoruzlar” bu müddət ərzində AÇ-2016-nın və DÇ-2022-nin finalında uduzublarsa, DÇ-2018-in qalibi olublar. Komanda DÇ-2014-də mübarizəni 1/4 finalda, AÇ-2020-də isə 1/8 finalda dayandırıb. Ümumilikdə Fransa Deşamın başçılığı altında keçirdiyi 139 oyundan 89 qələbə, 28 heç-heçə və 22 məğlubiyyət ilə ayrılıb. Şayiələrə inansaq, Deşamla müqaviləni yeniləmək qərarını FFF prezidenti Noel Le Qre özü şəxsən qəbul edib və bu barədə İcariyyə Komitəsinə məlumat verməyib. Komitənin son iclasında bu məsələni müzakirəyə çıxarmayan Le Qre daha sonra birbaşa Deşamla görüşərək müqavilənin detallarını razılaşdırıb. Tərəflər arasında AÇ-2024-ə qədər işbirliyinin olacağı gözlənilirdi. Amma Deşam Le Qreni DÇ-2026-ya qədər bu vəzifədə qalmağa razı sala bilib.

Deşamla yeni müqavilənin imzalanması heç də hamının ürəyincə olmayıb. Məsələn, son mundialın ardından yığma karyerasını bitirdiyini açıqlayan Kərim Benzemanın yaxın dostu və sabiq meneceri Kərim Cəziri “tvitter”də diqqətçəkən sözlər yazıb. Cəziri bir müddət öncə iddia etmişdi ki, Benzema DÇ-2022-də 1/8 finaldan etibarən yığmaya kömək etməyə hazır idi və onu yığmanın düşərgəsindən məhz Deşam qovubmuş. Bu dəfə isə Cəzirinin reaksiyası belə oldu:

“RMC Sport”un versiyasına görə Benzema rəsmi şəkildə qərarını açıqlasa da, yığmaya qayıdacağını istisna etmirdi. Bunun üçün əsas şərt baş məçqi postuna Zidanın gəlməsi idi. Amma Deşamla müqavilənin yenilənməsindən sonra bu məsələ birdəfəlik aktuallığını itirdi. Ümumiyyətlə, şaiyələrə inansaq, FFF-nin son qərarının ardından ikili vətəndaşlığa malik olan və Zidanın gəlişini gözləyən bir çox istedadlı futbolçu Fransa yığmasında oynamaqdan imtina edib! Belə oyunçulardan biri Ussem Auardı. “Lion”un şərəfini qoruyan 24 yaşlı yarımmüdafiəçi Fransa yox, Əlcəzair yığmasına üstünlük vermək niyyətindədi. Baxmayaraq ki, o, Fransanın əsas yığmasında artıq 1 oyun keçirib.