Türkiyə Futbol Federasiyasının mövsümün qalan hissəsi ilə bağlı qərarı ilə heç cür razılaşmaq istəməyən ''Beşiktaş'' radikal addım atmağa hazırlaşır. İstanbul nəhəngi UEFA-ya müraciət etmək niyyətindədi.

"Football-plus.az" xəbər verir ki, zəlzələdən sonra ''Hatayspor'' və ''Qaziantep'' çıxışını davam etdirə bilməyərək bu mövsümlük superliqadan çəkilmişdi. TFF isə onların əvvəlki nəticələrinin qüvvədə qalması şərti ilə sonrakı qarşılaşmalarda rəqiblərinə 3:0 hesablı texniki qələbə verilməsinə qərar vermişdi. Amma ''Beşiktaş'' bununla razılaşmaq istəmir. İstanbul nəhəngi ilk günlərdən iddia edirdi ki, ''Hatayspor'' və ''Qaziantep''in mövsümün əvvəlindən bəri keçirdiyi bütün oyunların nəticələri ləğv olunmalı və həmin oyunlara görə onların rəqiblərinin hesabına 3 xal əlavə olunmalıdı. Çoxları bunu ''Beşiktaş''ın ilk dövrədə Hatay və Qaziantepdə qalib gələ bilməməsi ilə əlaqələndirmişdi. Axı ''Beşiktaş''ın tələbi həyata keçəcəyi təqdirə komandanın hesabına 5 xal əlavə olunacaq. Amma digər tərəfdən ''Beşiktaş'' da tələbində özünə görə haqlıdı. Məsələn, ilk dövrədə ''Fənərbaxça'' ilə ''Qalatasaray'' ''Hatayspor''la öz meydanında qarşılaşdı və hər iki nəhəng 4 cavabsız qolla qalib gəldi. ''Beşiktaş'' isə ''Hatayspor''la səfərdə qarşılaşdı və 1:2 hesabı ilə uduzdu. Gəlin, etiraf edək ki, ev və səfər oyunları tamam fərqli anlayışdı. ''Beşiktaş''ın günahı nədədi ki, ''Hatayspor''la ilk oyunu səfərdə keçirməli oldu? Komanda bu vəziyyətdə sadəcə püşkün və təqvimin qurbanına çevrildi. İstər-istəməz idman prinsipləri pozulur. ''Ağ-qaralar''ın dilə gətirdiyi narazılıq məhz bundan ibarətdi.

Məsələ bir müddət aktuallığını itirdikdən sonra ''Fənərbaxça''nın baş məşqçisi Jorje Jezuşun sözləri ilə yenidən aktuallaşdı. Jezuş ''Türkiyədə oyunlar meydanda yox, masa başında qazanılır'' deyərək bu mövsüm çempionluq uğrunda pley-offun tətbiq edilməsini tələb etdi. Jezuş həmin ifadəsi ilə heç də oyun alqı-satqısına işarə vurmur. Halbuki bəzi şərhçilər Jezuşun sözlərini məhz bu tərəfə yozur. Məhşur portuqaliyalı sadəcə üstüörtülü şəkildə ''Hatayspor'' və ''Qaziantep''in oyunlarında rəqiblərə texniki qələbələr verilməsini tənqid edib. ''Beşiktaş'' rəhbərliyi isə Jezuşun bu məsələdə onlarla eyni mövqedə olduğunu görərək daha da ruhlanıb. ''Qartal'' rəhbərliyi əvvəlcə məsələni TFF-nin nəzdində fəaliyyət göstərən Apellyasiya Komitəsinə daşıyacaq. Burdan rədd cavabı alacağı təqdirdə isə UEFA-ya müraciət edəcək. ''Ağ-qaralar'' Çempionlar Liqasına aid oyun qaydalarının 28 maddəsinin 3-cü bəndini əlində bayraq tutur. Həmin maddədə qeyd olunub ÇL-in qrup mərhələsinin gedişində bir komanda hər hansı bir səbəbə görə diskvalifikasiya edilsə və ya çıxışını davam etdirə bilməsə, həmin komandanın qrupda keçirdiyi bütün oyunlarının nəticələri ləğv olunur. ''Beşiktaş''ın vəkilləri bununla bağlı UEFA-ya daha bir neçə misal çəkmək niyyətindədi. Məsələn, ötən mövsümün gedişində Almaniyanın 3-cü liqasında çıxış edən ''Münhen Türkgücü'' sel fəlakətinin qurbanı olduğundan çıxışını dayandırmaq məcburiyyətində qalmışdı. Yerli federasiyanın qərarı ilə bu klubun əvvəlki oyunlarının nəticələri ləğv edilmişdi. Eyni hal ötən mövsüm Polşa futbolunda da yaşanmışdı.

ƏLİ