Bu transfer dönəmini fəal keçirən “Beşiktaş”la bağlı növbəti xəbərlər var.

İstanbul nəhəngi Əmir Hadziahmetoviç, Onur Bulut və Omar Kollinin ardından 4-cü transferini həyata keçirib. “Qartal” “Qaziantep”in rumıniyalı ulduzu Aleksandru Maksimi mövsümün sonuna qədər icarəyə götürüb. Bilindiyi kimi, “Hatayspor”la “Qaziantep” zəlzələyə görə superliqadan çəkildiyindən Türkiyə Futbol Federasiyası yeni qərar qebul etmişdi. Bu iki klubdan əcnəbi oyunçu transfer edən kollektivlərə limit məsələsində güzəşt olunacağı bildirilmişdi.
Həmin klubların start heyətində 9 əcnəbi oynatmasına icazə verilmişdi. Daha öncə “Ştutqart” və “Maynts-05”də forma geyən 32 yaşlı Maksim 2020-nin yanvarından bəri “Qaziantep”in şərəfini qoruyurdu. Təcrübəli yarımmüdafiəçi Antep klubunda 115 rəsmi oyunda 43 qol, 23 məhsuldar ötürməlik performans sərgiləmişdi.

“Beşiktaş”dan ayrılan futbolçular da var. Söhbət ilk növbədə Jozef de Souzadan gedir. Son günlər Türkiyə mətbuatında təcrübəli braziliyalı futbolçunun Çin təmsilçisi “Beytsin Qoyan”la danışıq aparması barədə sürpriz xəbərlər peyda olmuşdu. Çinlilərlə ikiillik anlaşma əldə etdikdən sonra Souza “Beşiktaş” rəhbərliyindən onu buraxmalarını xahiş etdi. “Sambaçı” bu mövsüm tez-tez zədələndiyindən onsuz da komandaya istənilən faydanı vermirdi. Ona görə də rəhbərlik baş məşqçi Şenol Günəşlə məsləhətləşdikdən sonra onun ayrılmasına razılıq verdi. Souzanın müqavilə müddəti mövsümün sonunda başa çatırdı.

Türkiyə mətbuatının yazdığına inansaq, “sambaçı”nın klubdan təxminən 1,1 milyon avro alacağı var idi və o, bu pulun hamısından imtina etdi! Bilindiyi kimi, bu futbolçu 5-ci turda “Ankaragücü” ilə səfər oyunundan sonra komanda yoldaşını qorumaq üçün fanatlardan birini vurmuş və buna görə də federasiya tərəfindən cəza almışdı. Həmin vaxt mətbuat konfransı keçirən Souza göz yaşı içində bu haqsız qərara etiraz əlaməti kimi mövsümün sonunda Türkiyədən ayrılacağını demişdi.

Bundan başqa, Souza bu yaxınlarda zəlzələnin qurbanı olan və valideynlərini itirən uşaqlardan birini övladlığa götürmək üçün müraciət etsə də, onun istəyi geri çevrilmişdi. Qeyd edək ki, daha öncə 2015-18-ci illərdə “Fənərbaxça”nın şərəfini qorumuş yarımmüdafiəçi 2020-dən “Beşiktaş”da çıxış edirdi. İlk mövsümdə komandasının çempionluğunda mühüm rol oynayan braziliyalı ümumilikdə “ağ-qaralar”ın heyətində 88 rəsmi oyunda 9 qol, 4 məhsuldar ötürmə ilə fərqləndi. “Beşiktaş”dan ayrılan digər futbolçu Əmrəcan Uzunhandı. Mövsümün əvvəlində “İstanbulspor”dan transfer edilən 22 yaşlı mərkəz müdafiəçisi yaya qədər icarə əsasında “Antalyaspor”da çıxış edəcək. Əmrəcan istanbulluların heyətində cəmi 6 rəsmi oyuna çıxa bilmişdi. Bəzi mənbələrin iddiasına görə, Atiba Hatçinsonun da müqaviləsi qarşılıqlı razılıqla ləğv olunub. Amma bununla bağlı rəsmi açıqlama yoxdu.

Xatırladaq ki, fevralın 8-də 40 yaşını tamamlayan kanadalı yarımmüdafiəçi “Beşiktaş”da 10-cu mövsümünü keçirir.