“Qarabağ” Belçikada rekorda imza atıb
“Qarabağ” ötən həftə Konfrans Liqası ilə vidalaşdı. Ağdamlılar turnirin pley-off mərhələsində “Gent”ə məğlub oldu.
“Köhlən atlar” həmin matçda oyun baxımından, demək olar ki, heç nə ilə yadda qalmadı. Lakin azarkeşlər özünü yaxşı tərəfdən göstərdi. Son çempion 1000 bilet satmaq ixtiyarında idi. Oyunun şərhçisi Rüstəm Əfsərli görüş ərzində belə fikir səsləndirdi:
“Klub rəsmilərindən aldığımız məlumata görə, 850 bilet satılıb. Bu “Qarabağ”ın avrokuboklardakı səfər matçlarında rekorddu”.
Görəsən, onun dedikləri nə qədər doğrudu? Hər halda, həmkarımız olduqca təcrübəli jurnalistdi. O, məlumatın doğruluğunu təsdiqləməmiş efirdə səsləndirməz. Yenə də dəqiq məlumat almaq üçün Ağdam təmsilçisinin mətbuat xidmətinin rəhbəri Gündüz Abbaszadəni aradıq:
“Stadionun ümumi azarkeş tutumunun 5 faizi bizə verilə bilərdi. Bu da 1000 nəfər edirdi. 843 bilet satılmışdı. Rekordla bağlı dəqiq nəsə deyə bilmərəm. Əvvəlki illərdə belə halın yaşanıb-yaşanmadığını bilmirəm. Amma mən çalışdığım vaxt ərzində ilk dəfə avrokuboklarda səfər matçında bu qədər azarkeş “Qarabağ”ı dəstəkləyirdi. Əvvəlki illərin statistikası haqda məlumatım yoxdu. Amma ən yaxşı göstəricilərdən biri idi. “Gent”lə matçda bizə dəstək olan bütün azarkeşlərə təşəkkür edirəm”.
Gündüz bəyin açıqlaması ilə tanış olduz.
İnformasiyanı tam dəqiqləşdirmək üçün “Qarabağ”ın mətbuat xidmətinin sabiq rəhbəri Nurlan İbrahimovla əlaqə saxladıq. Hazırda “Can Sports” şirkətinin rəhbəri olan Nurlan bəydən “Gent”lə oyunda azarkeş baxımından rekorda imza atılıb-atılmadığını soruşduq:
“Əvvəlki illərdə də “Qarabağ”ın avrokuboklardakı səfər matçlarında bilet satışı olub. Həmin dövrdə də rəqib komandalar bizə sektor ayırıb. Xatırladığım qədər 500-600 bilet satdığımız oyunlar olub. Amma burda belə bir məqam var. Mən çalışdığım dövrdə bəzi azərbaycanlılar VİP-bilet alıb oyunu izləyiblər. 500-600 rəqəmi konkret sektor üzrə satılanlardı. Yəni “Gent”lə oyunda rekorda imza atıldığını deyə bilərik. Bunun da səbəbi bəlli idi. Çünki çox yaxşı təşkilati işlər görüldü. Bundan başqa, “Qarabağ”ın adından söz etdirməsi ölkə xaricində yaşayan soydaşlarımızın diqqətini cəlb edib. Bu səbəbdən də bu rekord qeydə alınıb. Ümid edirəm ki, “Qarabağ” növbəti avrokubok matçlarında həm nəticə, həm də azarkeş baxımından daha böyük uğurlar əldə edər”.
İLKİN SULTANLI
Digər xəbərlər
