Cümə axşamı Gentdə tarix yazılmadı.

“Qarabağ” Konfrans Liqasında mübarizəni penalti seriyasında dayandırdı. 1/8 finala “öküzlər” yüksəldi. Amma Belçika mətbuatı “Gent”in qələbəsini adi hadisə kimi işıqlandırıb. Həmkarlarımız daha çox “Anderlext”in “Ludoqorest”i mübarizədən kənarlaşdırmasına yer ayırıb. Bu da bizə o qədər də maraqlı deyil. Lakin “Gent”in qələbəsini xüsusi qeyd edənlər də var. Həmin yazılardan bir neçəsini diqqətinizə çatdırırıq.

Voetbal24.be. “Odlar yurdu”nun çempionu “Gent”i son ana kimi həyəcanlandırdı” sərlövhəli yazıda bunlar yer alıb: “Camışlar” Azərbaycanda 0:1 hesabı ilə məğlub olmuşdu. 1/8 final təhlükə altında idi. İlk yarını komandalar boşa verdi. İkinci hissədə isə “Gent” yaxşı mübarizə apardı. Bu da işə yaradı. Qış fasiləsində transfer olunan Orban meydana çıxandan 3 dəqiqə sonra azərbaycanlıları məyus etdi. Matçın sonuna kimi və əlavə vaxtda qol vurulmadı. Bu səbəbdən də penaltilərə ehtiyac duyuldu. “Gent”in futbolçuları burda şou göstərdi. Bunun nəticəsində də “camışlar” 1/8 finala yüksəldi. Komanda bazar günü Jan Breydə yollanacaq. Onlar “Brügge” ilə çempionatın pley-offuna yüksəlmək uğrunda mübarizə aparacaq. Bu qələbə Şərqi Flamand təmsilçisi üçün böyük motivasiya ola bilər”.

Footnews.be. “Heyn Vanhazebruk nə etməli olduğunu bilmirdi” sərlövhəli yazıda da maraqlı qeydlərə yer verilib: “Cümə axşamı “Gent” “Qarabağ”ı Konfrans Liqasının pley-offundan kənarlaşdırdı. Çətin qələbə oldu. “Camışlar” penalti seriyasında qələbə qazandı. İlk hissə haqda danışmağa ehtiyac yoxdu. Heyn Vanhazebruk nə etməli olduğunu bilmirdi. Komanda, demək olar ki, meydanda gəzişirdi. Rəqib isə hesabı qorumağa çalışırdı. İkinci hissənin ortalarına kimi bu taktika ilə oynadılar. Lakin yeni tapıntı Orban azərbaycanlıların ümidlərini puç etdi. Oyunun sonlarında isə meydanda mübarizə yox idi. Heç bir tərəf nə etmək istədiyini bilmirdi. Düzdü, son dəqiqədə azərbaycanlılar qol vurdu. Lakin Ramilin ötürməsindən öncə top qapı xəttindən çıxmışdı. Buna baxmayaraq, əlavə vaxt da daxil olmaqla başqa qol vurulmadı. Penalti seriyasında isə Benzyanın zərbəni dəqiq yerinə yetirməməsi işə yaradı. Mətbuat konfransında Heyn Vanhazebruk xoşbəxt görünürdü. Onun bu fikri isə xüsusi diqqət çəkdi: “Sizə demişdim ki, 5-ci gün görüşərik. Əsas odu ki, sərfəli nəticə əldə etdik”.

İLKİN SULTANLI