“Bavariya”da qapıçı mövzusunda uzun müddətdi yaşanan gərginlikdən ziyan görənlərdən biri Türkiyə yığması oldu. “Ay-ulduzlular”da baş məşqçi Ştefan Kuntsun köməkçilərindən olan və qapıçılar üzrə məşqçi funksiyasını icra edən Mixael Rexner bundan sonra “Bavariya”da işləyəcək.

Bilindiyi kimi Münhen nəhəngində Manuel Noyerin ayağını qırması ilə başlayan, onun əvəzinə isveçrəli Yan Zommerin transfer olunması ilə davam edən qapı mövzusundakı “sabun operası”nın kuliminasiya nöqtəsi qapıçılar üzrə məşqçi Toni Topaloviçin qovulmasl olmuşdu. 2011-dən “Bavariya”da çalışan və Noyerin yaxın dostu olan Topaloviçin qovulmasına Noyer özü çox sərt reaksiya vermiş və daha sonra klub rəhbərliyi onu belə desək yerində otuzdurmağa çalışmışdı. “Rekordmayster” bu problemi Mixael Rexnerlə yoluna qoymaq qərarına gəlib. Almaniya futbolunun flaqmanında bundan sonra qapıçılarla işləyən məşqçi funksiyasını məhz bu mütəxəssis icra edəcək. Müqavilənin detalları barədə məlumat verilmir. Topaloviçin qovulmasının bir səbəbi də onun baş məşqçi Yulian Naqelsmann ilə anlaşa bilməməsi idi. Ona görə də Topaloviçin yerinə məhz Naqelsmannı gözəl tanıyan bir məşqçinin gətirilməsi təəcüblü sayılmamalıdı. 42 yaşlı Rexner 2008-ci ildən etibarən “Hoffenhaym”ın akademiyasında çalışırdı. Uzun müddət U-23 komandasında və ikinci komandada işlədikdən sonra o, 2015-də “kəndçilər”in əsas komandasında çalışmağa başladı. Naqelsmann da bilindiyi kimi 2016-19-ci illərdə bu klubda çalışıb. Bu üzdən onlar bir-birilərini gözəl tanıyırlar. Kun Kastels, Qreqor Kobel, Marvin Şvabe və Oliver Baumann kimi tanınmış qapıçıların yetişməsində müstəsna əməyi olan Rexner 2021-ci ilin oktyabrından etibarən birdən-birə iki yerdə çalışmağa başladı. Ştefan Kuntsun dəvəti ilə o, Türkiyə yığmasının da məşqçilər korpusuna daxil edildi. Amma Rexnerin yığma fəaliyyəti yalnız yığmaların oyunları ərəfəsində başlayırdı. Qalan vaxtda isə o, “Hoffenhaymda” işləyirdi. Bu qapıçı hər iki işindən ayrılaraq bundan sonra yalnız “Bavariya” üçün çalışacaq. Kunts Almaniya mətbuatına açıqlamasında bunları deyib: “Rexner öz işini yüksək səviyyədə yerinə yetirdi. Türkiyə yığmasında hər oyundan əvvəl rəqibləri incələyirdi və qapıçıları da buna uyğun hazırlaşdırırdı. Türkiyə Futbol Federasiyası ona minnətdardı. Rexner öz işində ən yaxşılardan biri olduğuna görə onun ayrılması bizim üçün heç də pozitiv xəbər olmadı”.

Çərşənbə günü Almaniyaya gələn, amma gələn həftə yenidən Türkiyəyə qayıtmağı planlaşdıran 60 yaşlı mütəxəssis qardaş ölkənin təxminən 30 faizini yerlə bir edən zəlzələ haqda da danışıb: