Son oyunlarda istədiyi nəticələri qazana bilməyən “Beşiktaş” transferdə fəallaşıb. Bu qış Vensan Abubakarı azad agent statusunda heyətinə qatan və 3,2 milyon avro qarşılığında “Konyaspor”dan bosniyalı yarımmüdafiəçi Əmir Hadziahmetoviçi transfer edən İstanbul nəhəngi daha iki oyunçunun keçidini açıqlayıb.

Bunlardan biri Onur Bulutdu. Bu transfer “Kayserispor” ilə “Beşiktaş” arasında gərginliyin yaşanmasına səbəb olub. “Qartal” bu transferi ayın 8-i rəsmən açıqladı. Öncə vurğulayaq ki, son dönəmlərdəki yüksəlişi ilə diqqət çəkən və hətta Türkiyə yığmasına da dəvət almağa başlayan Onur Bulut sağ cinah müdafiəçisidi. Almaniyada doğulan və karyerasına bu ölkədə başlayan 28 yaşlı futbolçu 2019-dan bu yana Türkiyədə çıxış edir. O, “Alanyaspor” və “Çaykur Rizəspor” macərasının ardından 2021-in yayından bu yana Kayseri klubunun şərəfini qoruyurdu. Onurun müqavilə müddəti bu yay başa çatırdı və onun “Fənərbaxça”ya keçəcəyi güman olunurdu. Amma uzun sürən danışıqlara baxmayaraq klublar arasında anlaşma əldə etmək mümkün olmadı. Fevralın 6-da isə “Kayserispor” Bulutla üçillik yeni müqavilə imzalandığını rəsmən açıqladı. Düşünmək olardı ki, bu məsələyə son qoyuldu. Amma bundan 2 gün sonra “Beşiktaş”ın Bulutu transfer etməsi aləmi bir-birinə vurdu. “Ağ-qaralar” yığma üzvü ilə 2026-cı ilə qədər müqavilə imzaladılar. Şenol Günəş zatən Valentin Rozyenin performansından narazı idi və müdafiənin sağ cinahının gücləndirilməsini tələb edirdi. Transfer açıqlandıqdan bir neçə saat sonra məlum oldu ki, Onur “Kayserispor”la müqaviləsini birtərəfli qaydada pozaraq “Beşiktaş”a yollanıb. Təbii ki, Kayseri klubu həm futbolçunun özünü, həm də ölkənin bu çətin vaxtında oyunçunu əldə etmək üçün müxtəlif üsullara əl atan “Beşiktaş”ı qınadı. Amma məlum oldu ki, “Kayserispor”un dərdi 1 milyon avroluq təzminat imiş. Sadəcə “Beşiktaş” əvvəlcə bunu ödəmək istəmirdi. Amma pul ödənildikdən sonra ara sakitləşdi. Onur Bulut vida mesajında rəhbərliyin ayrılmağa icazə verdiyini bildirərək “Kayserispor”lulardan halallıq istədi! O, bu mövsüm 21-i superliqa, 3-ü ölkə kubokunda olmaqla keçirdiyi 24 rəsmi qarşılaşmada 3 qol vurub.

“Beşiktaş”ın digər yeni transferi isə Omar Kollidi. “Sampdoriya”dan 2,3 milyon avroya transfer edilən 30 yaşlı qambiyalı futbolçu ilə “2,5+1” illik müqavilə imzalanıb. 191 sm boya malik olan Kolli mərkəz müdafiəçisidi. 2018-dən bu yana Genuya klubunda çıxış edən qaradərili futbolçu buna qədər isə Avropada “KuPS”, “Yurqarden” və “Genk”in şərəfini qoruyub. Bu mövsüm A seriyasında 16 oyuna çıxan Kolli peşəkar karyerası ərzində 355 rəsmi oyunda 20 qol, 2 məhsuldar ötürmə ilə fərqlənib. “Beşiktaş” bu oyunçunu “Hamburq”a icarəyə göndərdiyi Fransisko Monteronun əvəzinə transfer edib. Yeri gəlmişkən bu oyunçunun yaxın qohumu Ebrima Kolli də Türkiyədə top qovur və “Fatih Karagümrük”ün şərəfini qoruyur.