“Bavariya” rəhbərliyi Tomas Müller ilə yeni müqavilə üçün razılığa gəlib.

“Bild” qəzetinin məlumatına görə, klub 32 yaşlı yarımmüdafiəçi ilə müddəti 2025-ci ilədək olan yeni müqavilə bağlayacaq. Alman futbolçunun hazırkı sözləşməsinin müddəti 2023-cü ilə qədərdi.

Qeyd edək ki, Müller “Bavariya”nın yetirməsidi. O, bu mövsüm bundesliqada 29 matçda meydana çıxıb, 7 qol vurub və 19 məhsuldar ötürmə edib.
Rəhbərlik daha bir təcrübəli futbolçu - qapıçı Manuel Noyerlə də yeni müqavilə imzalamaq qərarına gəlib. Bununla bağlı tərəflər arasında razılıq əldə olunub. Razılığa əsasən, 36 yaşlı qolkiperlə 2023-cü ilin yayında qüvvədən düşəcək müqavilənin müddəti daha ikiilliyə uzadılacaq. Noyer “Bavariya”da 2011-ci ildən oynayır. O, bu mövsüm bundesliqanın 25 oyununda qapını qoruyub.

Komandanın daha bir qapıçısı Sven Ulrayxın müqaviləsinin müddəti isə birilliyə artırılacaq. Bu mövsüm ölkə çempionatının 5 oyununda iştirak edən futbolçu 2023-cü ilə qədər “Bavariya”da qalacaq.