Braziliya Futbol Konfederasiyasından (BFK) məhkəməyə şikayət edilib.

Football-plus/az xəbər verir ki, bir qrup qeyri-hökumət təşkilatı Braziliya Milli Heyvanların Rifah Forumu ilə birlikdə dünya çempionatında yaşanan pişik qalmaqalına görə belə addım atıb.

Xatırladaq ki, mundialın 1/4 finalının Xorvatiya - Braziliya oyunundan (1:1, p. - 4:2) əvvəl keçirilən mətbuat konfransında Braziliya millisinin mətbuat katibi mikrofonların quraşdırıldığı masaya çıxan pişiyi əvvəlcə sığallasa da, sonra onu götürərək yerə tullamışdı. Onun bu hərəkəti Braziliya ictimaiyyətində kəskin narazılıq doğurmuşdu. “El Grafico” nəşrinin məlumatına görə, bir sıra qurumlar BFK-dan 1 milyon real (təxminən 176 min avro) təzminat tələb edir.

İddiaçılar həmçinin futbol təşkilatından ictimai şəkildə üzrxahlıq, həmçinin ətraf mühit və heyvanlara qulluq təşkilatının əməkdaşları üçün mühazirə təşkil etməyi tələb ediblər.