AFFA-nın nəzdində fəaliyyət göstərən bir qurum var, adı Məşqçilər Komitəsidi (MK), 2014-ün noyabrında ideya şəklində ortaya atıldı, dekabrın 3-də isə tərkibi və vəzifələri müəyyənləşdi. Vaqif Sadıqovun rəhbərlik etdiyi, Ağasəlim Mircavadov, Böyükağa Hacıyev və Şahin Diniyevin üzv kimi fəaliyyət göstərdiyi qurumun vəzifələri sırasına bütün yaş qrupu üzrə yığmalara, klubların işinə nəzarət, onlara yardım etmək, ölkə futbolunun perspektivi baxımından cəlbedici ideyalar irəli sürmək daxil idi. İnsafən, AFFA ötən müddətdə komitənin faydalı fəaliyyəti üçün hər cür şərait yaradıb, qurumun işini maliyyələşdirib, sədrin və üzvlərin başqa ölkələrə səfərlərinin sayı-hesabı yoxdu.

Bəs Məşqçilər Komitəsi gözlənilən effekti verdimi?

Mən bir qədər sonra bu məqamın üzərinə qayıdacam. Amma əvvəlcə AFFA prezidenti Rövnəq Abdullayevin 2014-cü il dekabrın 3-də keçirilən mətbuat konfransında səsləndirdiyi bir fikri xatırlatmaq istəyirəm: “Məşqçilər Komitəsinin üzvlərindən kimsə hansısa kluba baş məşqçi təyi edilsə, bu halda komitədəki vəzifəsindən azad olunacaq”. Bəli, eynən belə demişdi, amma deməmişdi ki, komitədəki vəzifəsindən azad olunan şəxsin dəfələrlə bura dönmək imkanı olacaq və ya Vaqif Sadıqov MK-nı konkret bir neçə şəxsdən ibarət qapalı dairəyə çevirəcək. Xatırladım ki, yuxarıda adı çəkilən “üçlüy”ə az sonra Şakir Qəribov da qoşuldu, 2015-in iyununda Diniyev “Kəpəz”ə yollandı və onun yerini Əsgər Abdullayev tutdu. Əsgər bəy ayrı-ayrı klublarda “gözünün qurdunu öldürəndən” sonra işsiz qaldı və dərhal MK yada düşdü. Vaqif bəyin xeyir-duası ilə Abdullayev də komitəyə qaytarıldı. İndi də yeni variantlar var. Məsələn, Yaşar Vahabzadə “Kəpəz”dən istefa verəndən sonra sakitcə bir kənara çəkilir və Sadıqovdan işarə gözləyir ki, Diniyev “Səbail”ə yollanan kimi sənin MK-da yerin hazırdı. Öz aramızdı, belədə Vahabzadə niyə Gəncədə özünü oda-közə vurmalıdı ki? Onsuz da bilir ki, “Kəpəz”dən göndərilsə, MK-da asanlıqla iş tapacaq. Və ya bu zənciri başqa cür davam etdirək: sabah Diniyev uğursuzluğa düçar olanda (bunu arzulamıram, amma real variantdı) AFFA-ya yaxın klub kimi “Səbail”in rəhbərliyi Sadıqova müraciət edəcək ki, baş məşqçi vəzifəsinə namizəd göstər. Vaqif bəy də deyəcək ki, buyurun, Vahabzadə sizin qulluğunuzdadı, Diniyevi də bizə qaytarın. Əvvəldə xatırlatmışdım, vaxtilə Diniyev də “Kəpəz”in baş məşqçi vəzifəsinə yollananda MK-dakı fəaliyyətini dondurmuşdu, Gəncədən ayrılandan sonra yenidən işinə bərpa olundu. Bax, mən bu mənzərəni göz önünə sərmək istəyirdim. Gördüyünüz tablodan məmnunsuzmu?

Futbol ictimaiyyətində istər-istəməz belə sual yaranır ki, nədən MK-da yalnız konkret bir neçə nəfər çalışa bilər, daha doğrusu, burda çalışmaq üçün mütləq Vaqif Sadıqova yaxın olmaq lazımdı? Zatən indiki tərkib fərqli düşünmək üçün əlyeri qormur. Sadıqov vaxtilə Mircavadovun rəhbərliyi altında çalışıb, Diniyev, Vahabzadə, bir müddət komitədə çalışan, sağlıq durumu ilə bağlı problemlər üzündən ayrı düşən Qəribov və Abdullayev də sədrlə komanda yoldaşı olub.

Beləliklə, yalnız rəhbərə (oxu: Vaqif Sadıova) yaxınlıq, sədaqət prinsipi əsasında formalaşan komitənin ölkə futbolu naminə faydalı fəaliyyət göstərəcəyinə, hansısa inqilabi ideyalarla çıxış edəcəyinə inanmağa dəyməz. Sadəcə, arabir yığışırlar, danışırlar və dağılışırlar. AFFA rəhbərliyi sağ olsun, üzvlərinə yaxşı maaş verən bir qurum yaradıb, onlar da fəaliyyət adına fəaliyyətsizlik göstərirlər. Elə bu sətirləri bilgisayarda yığanda, bilirsiz, qəfil ağlıma hansısa variant gəldi? Deyirəm ki, kaş ölkə klublarından hansısa Vaqif Sadıqovu baş məşqçi vəzifəsini qəbul etməyə razı salaydı. Görəsən, klubda çalışandan və hansısa səbəbdən ordan ayrılandan sonra Vaqif bəy MK-da sədr vəzifəsinə qayıda bilərdimi? Yəni qapalı dairələrdə sədr yeri də vakant saxlanılırmı? Baxma da, üzv başqadı, sədr başqa... İndi Məşqçilər Komitəsi ilə bağlı mənim üçün yaşayan yeganə intriqa məhz budu. Üzvlər baxımından onsuz da problem yoxdu. Necə deyərlər, əl əli yuyar, əl də üzü!

...Bəlkə də Böyükağa Hacıyev vaxtında bu dünyanı tərk etdi, MK ilə bağlı köhnə-yeni hoqqaları çox görmədi!

HUŞƏNG