Beyl millinin səfiri olacaq
Beyl milli komandanın səfiri ola bilər.
Football-plus.az xəbər verir ki, Uels Futbol Assosiasiyasının rəhbərliyi yaxın vaxtlarda onunla bu mövzuda fikir mübadiləsi aparacaq. Səfir statusu Qaretə yalnız yığmaya yox, həm də ölkənin futbol rəsmilərinə yaxın olmaq imkanı verə bilər.
Rob Peyc bu həftənin əvvəlində onunla söhbət edib. Milli komandanın baş məşqçisi jurnalistlərə görüşlə bağlı bunları deyib: "Mən Qaretin yığmamıza hansısa statusla yaxın olmasını istəyirəm, onunla söhbətimiz bu mövzuda olub. Beylə hansı rolun verilə biləcəyi haqda hələlik dəqiq nəsə deyə bilmərəm. O, hələ bir müddət ailəsinə daha yaxın olmağa ehtiyac duyur. Odu ki, məsələnin təfərrüatı ilə bağlı heç nə deyə bilməyəcəyəm. Normal həyata qayıdış onun üçün böyük dəyişiklik sayılır. Biz Qaretlə məlum mövzuda bir neçə həftədən sanra da müzakirə aparacaq və sonrakı işlərin planını quracağıq. O, bizə bir çox təklif irəli sürə bilər. Beylin hətta, sadəcə, komandanın paltardəyişmə otağında və qaldığı oteldə görünməsi də məni çox sevindirərdi. Yığmamıza bundan sonra da yaxın olmasını çox faydalı hesab edirəm. Çünki futbolla bağlı əla fikirləri var. Məhz bunu bilərək Qaretlə görüşü zəruri saymışam. O, milli komandanın bundan sonrakı inkişafı üçün çox təklif edə bilər”.
Digər xəbərlər
