Uzun fasilədən sonra elitaya qayıdan "Turan Tovuz" sərgilədiyi oyunla çoxlarının zövqünü oxşayır.

Əksəriyyət "boz qurdlar"ın autsayderlər sırasında olacağını gözləsə də, komanda hazırda 6-cı pillədə qərarlaşıb. Tovuz təmsilçisinin uğurlarında əsas pay sahiblərindən biri də kapitan Şəhriyar Əliyevdi. Dünən təcrübəli müdafiəçi ilə əlaqə saxlayıb, komandası, zədəsi və başqa mövzularla bağlı danışdıq.

- 14 tur arxada qalıb. "Turan Tovuz"un çıxışını necə qiymətləndirirsən?

- Yeni yaranan komandayıq. Oyundan-oyuna daha yaxşı olmaga calışırıq. Hər kəs əlindən gələni edir ki, daha yaxşı oyun sərgiləyib nəticələr qazanaq.

- "Şamaxı"ya qarşı çətin kubok oyununa çıxacaqsız. Şansları necə dəyərləndirərdin?

- Həqiqətən bizi ağır qarşılaşma gözləyir. "Şamaxı"nın necə oynadığını görürük. İnşallah, Tovuza yaxşı nəticəylə qayıtmaq, mərhələni keçmək istəyirik. Kubok görüşləri cempionatdan fərqlidi. Ona görə belə matçlarda diqqətli olmaq lazımdı.

- Son turda zədələnmişdin, hazırda vəziyyət necədi?

- Şükür, müalicə bitib, artıq komanda ilə məşqlərə başlamışam. Hər şey qaydasındadı.

- Qış fasiləsinə kimi qarşınıza hansı hədəf qoyulub?

- Mövsümün əvvəlində, komanda yığışanda qarşımıza hansısa yerlər uğrunda mübarizə aparmaq qoyulmayıb. Əsas hədəflər yaxşı komanda formalaşdırmaq, oyun planında “artırmaq” və uğurlu nəticələr qazanmaqdı. İkinci dövrənin sonuna kimi daha cox xal qazanmaq istəyirik.

- Tovuz şəhər stadionu süni örtüklüdü. Bu sənin və komanda yoldaşlarının işini çətinləşdirmir?

- Düzünü desək, süni meydanda oynayanda çətinlik yaranır. Bizdə elədi ki, bir oyun otda, bir oyun sünidə baş tutur. Bu da futbolçuların zədələnməsinə, bərpa prosesinin gecikməsinə gətirib çıxarır. Belə olanda komanda hər oyuna sabit heyətlə çıxa bilmir.

- Yayda daha yaxşı təkliflərin olmasına baxmayaraq, daha aşağı maaşla "Turan Tovuz"u seçdin. Səbəb nə idi?

- Mövsümün sonunda yaxşı təkliflər vardı. Amma fikrimcə, özünü xoşbəxt hiss edəcəyin, daim diqqət görəcəyin komandanı seçməlisən. Yəni uyğunlaşma, kollektiv, baş məşqçi amili böyük rol oynayır. Bura gəlməmiş Ayxan müəllimlə danışdıq və ondan sonra Tovuz təmsilçisində oynamağa razılıq verdim.

- Tovuz azarkeşləri və futbolçular Ayxan Abbasovu çox istəyir. Onu başqa məşqçilərdən fərqləndirən nədi?

- Ən əsas fərq həmişə futbolcusunun yanında olmasıdı. Düşünürəm ki, bu boyuk amildi. Ayxan müəllimin bu xüsusiyyətini işlədiyi butun komandaların futbolcularından sorusa bilərsiz. Çox sey sadalamaq olar, mənə görə ən əsas olanı dedim.

- "Turan Tovuz"un azarkeşlərinə nə deyərdin?

- Tək oyunlarımıza yox, həm də məşqlərimizə belə təşrif buyuran, inanan, dəstək olan bütün azarkeşlərimizə minnətdarlığımı bildirirəm. Onların tribunalardakı şüarları, dəstəyi sayəsində uğurlar qazanmışıq

- Yığmamız son iki yoxlama matçında da uğurlu çıxış etməklə ardıcıl 5-ci qələbəsini qazandı…

- Milli komanda qələbə qazananda hər kəs sevinir. Şükürlər olsun, son 5 oyunda 5 qələbəmiz oldu. Hər zəfər millidə inamı daha da artırır. Qarşıdan seçmə mərhələ gəlir. Çox çətin qurupa düşmüşük. Amma mübarizə aparmalı, sona kimi döyüşməliyik. İnşallah, qələbələrin davamı gələr.

- Milli üzvü olsan da, son toplanışa dəvət almadın. Buna münasibətin?

- Hər kəs istəyir millidə oynasın. Bizim işimiz məsq edib ideal formada olmaq və oyunlarda yaxşı cıxışla baş məşqiçinin diqqətini çəkməkdi. Yəni çağrılmamışamsa, deməli, daha artıq işləməli, yaxsi performans sərgiləməliyəm.

- Əsas millidən fərqli U-21-in vəziyyəti ürəkaçan deyil. Son iki oyunda uduzduq, ümumilikdə 11 qol buraxıb, cəmi birini vurduq. Bu haqda nə deyə bilərsən?

- Səhv etmirəmsə, U-21-in bəzi üzvləri əsas komandada idi. Bu haqda baş məşqçiləri düşünür. İnanıram ki, gələcəkdə daha yaxşı olacaq.

- Dünya çempionatı start götürüb. Hansı komandaları daha şanslı sayırsan?

- Qətərlə vaxtilə yoldaşlıq görüşümüz olmuşdu deyə, onların oyunu maraqli gəlirdi. Amma həmişə ispanlara azarkeşlik etmişəm. Futbolçulardan isə Messinin fanatıyam. Onun son dunya cempionatı olduğunu nəzərə alsaq, Argentinanın cempionluğunu görmək istəyərdim. Finalda Braziliya - Argentina qarşılaşması baş tutsa, ürəyimcə olar.

ABDULLA İSMAYILOĞLU