Bu gün Avroliqanın G qrupunda "Qarabağ" sonuncu, eyni zamanda həledici matçına çıxacaq.
Ağdam təmsilçisi "Frayburq"u məğlub edəcəyi halda turnirin pley-offuna vəsiqə qazanacaq. "Köhlən atlar"a 1 xal da kifayət edə bilər. Bunun üçün paralel keçən "Olimpiakos" – “Nant” oyununda Fransa təmsilçisi uduzmalı və ya heç-heçə etməlidi.
"Football-plus.az" saytı olaraq "Qarabağ" - "Frayburq" matçıyla bağlı mütəxəssis rəyi öyrəndik. Sənan Qurbanovun fikirlərii belə oldu:
"Bu gün "Qarabağ"ı çox ağır oyun gözləyir. Hətta bugünkü matçı finala bərabər qarşıdurma da adlandırardım. "Frayburq" böyük motivasiya ilə Bakıya gəlib, iddialıdılar. Maksimum ehtiyatlı oynamalı, səhvlərə yol verməməliyik. "Frayburq" səhvləri bağışlamır. "Qarabağ" bu gün ağıllı və kollektiv futbol oynamaqla rəqibi üstəməlidi. Rəqibin ən böyük üstünlüyü odu ki, topu itirərkən bütün komandayla pressinq edir. Ağdam təmsilçisi bütün mövqelər üzrə, meydanın hər qarışında təzyiq etməklə rəqibə göz açmağa imkan verməməli, qol və qollar vurmaqla nəticəni qorumalıdı. İnanıram ki, “Qarabağ” bu gün sərgiləyəcəyi gözəl oyunla Avroliqada mübarizəni davam etdirəcək".
ABDULLA İSMAYILOĞLU