Sabah Avropa Liqasında qrup mərhələsinə yekun vurulacaq.

Təmsilçimiz "Qarabağ" son turda "Frayburq"u qonaq edəcək. Oyundan öncə ağdamlıların çalışdırıcısı Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:

- Futbolçuların psixoloji durumu necədi? Xüsusilə də Şahruddinin…
- Vacib oyundu. Son vaxtlar psixoloji durumdan çox danışılır. Peşəkarıq. Hər şey qaydasındadı. Bilirik ki, kimlə oynayırıq. Son Avropa oyunumuzdan 6 gün keçib və hər gün də Şahruddinin adı hallanıb. Ondan çox yazılır. Məni ən çox narahat edən budu. İstərdim ki, onun adı bu qədər hallanmasın. Bu, həm Şahruddində, həm də bütün komandada gərginlik yaradır. Həmişə azarkeşlərimizə güvənmişəm. Belə oyunlara real yanaşmalıyıq. Rəqiblərin gücü bizə bəllidi. Hamımız bir yerdə bu rəqiblərə qalib gələ bilərik. Belə hallar təsir edir. Heç bir psixoloji problemimiz yoxdu. Hamı başa düşür ki, bu cür oyunlarda özlərini necə idarə etməlidilər. Futbol səhvlər oyunudu. Belə hallar bütün matçlarda olur. Hər bir halda, fikirlərə hörmətlə yanaşıram. Şahruddində və digər futbolçularda hər şey qaydasındadı. Fikrimiz sabahkı oyunu yaxşı nəticə ilə başa vurmaqdı. İnşallah, xeyirlisi olar.

- Paralel müqayisə apara bilərsizmi: “Kopenhagen”lə cavab oyunu öncəsi hazırlıq necə idi, indi necədi?
- Mənim üçün müqayisə aparmaq asan deyil. Həmişə ilklərin dadı başqa olur. Daha yaxşı oyun, nəticə göstərməyə çalışmışıq. Ad olaraq Çempionlar Liqasının pley-offu daha həyəcanlı sayıla bilər. Amma bu matçı ondan ayırmazdım. Həyəcan həmişə olur, çempionat matçlarında da. Komanda, klub olaraq böyük təcrübəyə malikik. Sabahkı oyunda hamı istəkli, yaxşı mənada həyəcanlı olacaq. Hərəsinin öz yeri var. Daha çox istək və diqqətlə oyuna hazırlaşırıq.

- “Frayburq”un artıq liderliyi təmin etməsinin müsbət və mənfi cəhətləri kimi nələri qeyd etmək oalr?
- Necə cavab verəcəyimi bilmirəm. Bəzən komanda vəzifəni yerinə yetirəndə daha rahat oynayır və istədiyi oyunu tam göstərə bilir. Bəzən isə nəticə lazım olanda gərginlik yaşayırlar. Daha çox özümüz haqqında fikirləşirik. Onların nə etmək istədiklərinə zaman ayırsaq, özümüz üçün vaxtımız az olar. Sabah hansı heyətlə, sistemlə oynayacaqlarını gözləyəcəyik.

- Qara Qarayev, Bədavi Hüseynov və Leandro Andradenin oynamaq ehtimalı varmı?
- Bədavi oynaya bilməyəcək. Andradenin zədəsi davam edir. Hələ hazır deyil. Zədəsini yenilədi. Qara komanda ilə məşq etməyib, fərdi hazırlaşır. “23-lük”də olub-olmaması sabah bilinəcək. İkisi oynamayacaq, Qara da sual altındadı.

- “Qarabağ” 9 ildi, avrokuboklarda çıxış edir və heç vaxt qrupun son matçında qələbə qazana bilməyib. Bu uğursuz sindrom əlavə psixoloji gərginlik yaratmır?
- Keçmişə qayıtmaq istəmirik. Qarşımızda “Frayburq”la matç dayanır. Belə hallara önəm vermirəm. Uğursuz seriyamızın olması düşüncəsində deyiləm. Bizi maraqlandıran “Frayburq”la sabahkı matçdı. Qarşımızda yaxşı, intizamlı rəqib var. Alman komandasıdı. Bütün fikrimiz bu oyundadı. Ən yaxşı oyunlarımızdan birini keçirmək istəyirik.