"Düşünmürəm ki, favorit bizik" - Qurban Qurbanov
Sabah Avropa Liqasının qrup mərhələsinin 5-ci turuna start veriləcək.
Təmsilçimiz "Qarabağ" səfərdə "Nant"la qarşılaşacaq. Oyundan öncə ağdamlıların çalışdırıcısı Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:
"Çox önəmli oyundu. Matçın mahiyyətini başa düşürük. Qarşımızda çox istəkli komanda var. Yaxşı nəticə üçün çalışacağıq. Cüzi üstünlük rəqib tərəfindədi, çünki doğma meydanda oynayır. Belə bir şəhərdə, bu azarkeşlər qarşısında yaxşı nəticəyə çalışacağıq. Futbolçularımın əllərindən gələni edəcəyinə əminəm".
- Sizin üçün hücumda, yoxsa müdafiədə oynayan komandaya qarşı oynamaq çətindi?
- Deməzdim ki, hansısa rahat, hansısa asan olur. Baxır, rəqib oynadığı oyunu necə ortaya qoyur. "Nant"ın həm oyunçuları, həm taktikası güclüdü. Bakıda onların gücünü hiss etdik. 3:0 qalib gəlsək də, çətinliklərimiz çox olmuşdu. Rəqib bizə böyük təzyiq göstərsə, daha yaxşı müdafiə olunmalıyıq. Bu cür rəqibə qarşı müdafiədə də, hücumda da oynamaq çətindi.
- Deyirsiz ki, “Nant” güclü komandadı, amma evdə 3:0 uddunuz. Sizə görə favorit “Qarabağ” deyil?
- Yox, düşünmürəm ki, favorit bizik. Rəqibə hörmət edirəm. Bakıda ilk hissədə qol epizodları çox idi. Amma bəxtləri gətirmədi. Buraxılan qollarda da kobud səhvləri oldu. Onlar son illərdə inkişaf edirlər. Avroliqa matçlarında favorit olmur.
Digər xəbərlər
