''Sivasspor'' superliqanın son turunda faktiki mümkünsüz görünən bir qələbə qazandı.

İlk 8 turda qələbəyə həsrət qalan və cəmi 4 xal toplamaqla tarixinin ən uğursuz startını reallaşdıran Sivas təmsilçisi bu mövsüm keçirdiyi 17 rəsmi oyunun heç birində uduzmayan ''İstanbul BŞ''ni səfərdə 2:0 hesabı ilə yenməyi bacardı! Hər iki qolu hesabına Dia Saba yazdı. Son 2 mövsümü BƏƏ təmsilçisi ''Əl-Nəsr''də keçirən israilli futbolçu ''Sivasspor''a bu yay gəlib. Bu mövsüm onun hesabında 9 rəsmi oyunda artıq 4 qol və 2 məhsuldar ötürmə var. 29 yaşlı hucumameyilli yarımmüdafiəçi mövsümdəki ilk qələbənin ardından yaşadığı hissləri ''Fanatik''lə bölüşüb:

''Burda hər kəs məni çox yaxşı qarşıladı. Uyğunlaşdıqca performansımın da artdığını hiss edirəm. Kluba mümkün olduğu qədər fayda vermək istəyirəm. ''Sivasspor'' Avropa səviyyəli gözəl bir klubdu. Əslində Türkiyə futbolu haqda çox şey eşitmişdim. Burda oynayan bir çox dostum olub. Ona görə də Türkiyədən təklif gələndə çox sevindim. ''Sivasspor''u bir qədər araşdırdıqdan sonra bura keçməyin karyeram üçün gözəl bir addım olacağını düşündüm. Son oyuna qədər çempionatda durumumuz istədiyimiz kimi deyildi. Qələbəmiz yox idi və biz futbolçular buna görə çox narahatlıq keçirirdik. Təbii ki, fanatlarımız və yaxınlarımız da üzülürdü. Bu üzdən böyük bir motivasiya ilə meydana çıxdıq. Hərçənd çoxları bu oyunda qalib gələ biləcəyimizə inanmırdı. Rəqibimiz aşkar favorit sayılırdı. Amma bütün komanda şəklində qələbəyə inandığımız zaman nələr edə biləcəyimizi göstərdik. Məhz belə parlaq zəfərə çox ehtiyacımız var idi. Güclü rəqibi məğlub edəndə komandanın özünəinamı da artır. ''Sivasspor''un əvvəlki mövsümlərdə olduğu kimi çempionatda mümkün qədər yuxarı pillələrdə qərarlaşması üçün əlimizdən gələni edəcəyik. Cəmi ayyarımdı burdayam. Bu qısa müddət ərzində sərgilədiyim performans məni sevindirir. Amma tək mənim sevinməyimlə iş bitmir. Gərək komanda şəklində xoşbəxt olaq. Bunun da yeganə yolu qələbələr qazanmaqdı. Məni ''İstanbul BŞ''yə vurduğum 2 qoldan çox qalib gəlməyimiz sevindirdi. İndi qarşıda bizi Kosovo səfəri gözləyir. ''Ballkani''yə evdə uduzmaq hər birimiz üçün acı sürpriz oldu. Bu məğlubiyyətin qisasını almaq zamanıdı. Oyuna çox yaxşı köklənmişik. İnaniram ki, evə istədiyimiz nəticə ilə dönəcəyik''.