Çempionlar Liqasında ''Brügge'' nağılı davam edir.

"Football-plus.az" xəbər verir ki, Belçika çempionu inanılmaz performansla Avropanı mat-məəttəl qoyub. İlk 3 turda maksimum xal toplayan və qol buraxmayan ''Brügge''nin seriyalarının dünən ''Atletiko'' ilə səfər oyununda qırılacağı gözlənilirdi. Düzdü, qələbə seriyası qırıldı. Amma komanda onsuz da qələbəyə can atmırdı.

Qolsuz bərabərlik sayəsində ''Brügge'' həm qol buraxmamaq seriyasını davam etdirdi, həm də pley-offa vəsiqəni rəsmiləşdirdi! Simon Minyole oyunu 9 seyvlə başa vurdu! Ümumilikdə bu 4 qarşılaşmada o, qapısına gələn 21 zərbənin hamısını dəf edib. ''Brügge'' turnir ÇL adı ilə keçirilməyə başlandığı 1992-dən bu yana ilk dəfə pley-offa vəsiqə qazandı və bunu bacaran 3-cü Belçika təmsilçisi oldu. Daha öncə bunu 2000/01-də ''Anderlext'' və 2015/16-da ''Gent'' bacarmışdı. ''Brügge'' özü isə sonuncu dəfə Avropanın bir nömrəli turnirinin 1/8 finalında 1990/91 mövsümündə oynamışdı. Onu da bildirək ki, ÇL-də qrupun ilk 4 oyununda qapısını toxunulmaz saxlayan son klub 2010/11-də ''Mançester Yunayted'' olub.