"Qarabağ"ın baş məşqçisi Qurban Qurbanov Çempionlar Liqasının 2-c təsnifat mərhələsində İsveçrənin "Sürix" klubuna qarşı cavab matçından (2:2, ilk oyun 3:2) sonra mətbuat konfransında jurnalistlərin suallarını cavablandırıb.

Football-plus.az xəbər verir ki, 50 yaşlı mütəxəssis əvvəlcə qələbəni şərh edib:

- 90+6-cı dəqiqədə qol buraxdıqdan sonra komandaya nələr söylədiz?
- Bir az gərgin dəqiqələr idi. Amma futbol dilində hər şeyi anlatdıq. Komandaya güvənirdim. Bəzən belə oyunlar, futbolçuları, klubu, baş məşqçi kimi məni daha da böyüdür, təcrübəli edir. Bəzən belə hallarda uduzsaq belə, məyus olmuram. Çünki ən stressli, maraqlı anlardandır. Bəzən bu hissləri yaşamaq həyəcanlı olur. Bəzi tapşırıqları verdim. Daha diqqətli olmağı tapşırdım. Həmin dəqiqələrə uyğun göstərişlərimiz oldu. Maraqlı oldu, hər birimiz böyük təcrübə qazandıq.

- Zədəli futbolçuların durumu necədi?
- Kevin Medinanın zədəsi ciddiyə oxşayır. Sabah axşam saatlarında Bakıya çatacağıq. Ondan sonra daha dəqiq diaqnoz qoyulacaq. Digər oyunçularda yorğunluq idi. Ciddi bir şey olmamalıdı.

- "Ferensvaroş", yoxsa "Slovan"?
- Rəqibin heç bir fərqi yoxdu. ELə komandalardı ki, sanki bütün oyunlar pley-off mərhələsində gedir. Oyunlarına baxmamışam. Kim olsa da, daha çox özümüz yaxşılaşdırmağı düşünməliyik. Xeyirlisi nədisə, o da olacaq. Bir o qədər düşünməmişəm və fərqi də yoxdu.

- Oyunçu əvəzetmələriniz əsasən nəyə əsaslanır?
- 5 əvəzetmə olması belə oyunlarda üstünlükdü. Avrokuboklara görə tez başlayırıq. Belədə, komanda optimal formasından bir qədər uzaq olur. İlk oyunlarda oyunçuların hazırlıq dərəcəsi əvəzetmələrdə rol oynayır. Ancaq get-gedə oyunların gedişatı bizi belə addımlar atmağa məcbur edir. Həmişə ehtiyatımızı saxlayırıq ki, zədəli, yorulan futbolçular ola bilər.