Bazar günü Las-Veqasda keçirilən klasikonun statusu ilə bağlı suala ən yaxşı cavabı Karlo Ançelotti vermişdi.

Ötən mövsümün zirvə adamı “Barselona”ya qarşı oyunlar heç vaxt yoldaşlıq oyunu olmur” demişdi ki, onun sözləri həqiqətdə yaxındı. Birincisi, başqa yoldaşlıq oyunları bu qədər səs-küy doğurmur. İkincisi, Amerika torpağında baş tutan derbiyə La Liqanın ağlasığmaz intriqa vəd edən yeni mövsümünün reklam çarxı kimi baxmaq olardı. “Barsa” bu yay qeyri-adi transfer kampaniyası aparır. Kluba yaxın insayderlərdən biri bunu hətta futbol simulyatorundakı oyuna bənzədir. “Real” isə nöqtəvi transferlər həyata keçirməyə çalışır və Kərim Benzemanın üzərinə düşən yükü azaltmağı planlaşdırır. Ançelotti Eden Azardan “yalançı 9 nömrə” kimi yararlanmaq fikrindədi. Baş məşqçi hətta komandası üçün transfer kampaniyasının bitdiyini, hər şeyin ideal olduğunu deyir. “Barsa”nın transfer siyasəti ilə bağlı onu da demək olar ki, klub hazırda görünməmiş dərəcədə səxavətli davranır, geninə-boluna pul xərcləyir. “Əl-Sədd”i çalışdırdığı dönəmdə İrana baş çəkdiyinə görə Amerika vizasına gec qovuşan, bu üzdən yalnız cümə axşamı komandanın düşərgəsinə qoşulan Xavinin əlinin altında indi bərabərgüclü iki heyət var. Adətən, belə hallarda baş məşqçilərin xoş başağrısı ilə üzləşməsindən danışırlar. Görünür, Xavi də eyni problemi yaşayacaq. Əlbəttə, zədələr də futbolun ayrılmaz hissəsidi. Məsələn, Ferran Torres elə ilk məşqdəcə yüngül zədə aldı. Ancaq baş məşqçinin cinah forvardlarının seçimində necə davranacağı çox maraqlıdı. Elə həmin Torreslə yanaşı, Ansu Fati, Usman Dembele və Rafinya da var! Meydanın mərkəzində də inanılmaz rəqabət yaşanacaq. Qavi, Pedri, Frank Kessye, Serxio Buskets, hələ ki getmək qərarı verməyən Frenki de Yonq... Klub Memfis Depayla yanaşı, ona da getməyi təklif edir. Ancaq uşaqlıqdan “Barsa” vurğunu olan yarımmüdafiəçi “Mançester Yunayted”ə keçmək variantına laqeyd yanaşır. Frenki klub rəhbərliyinin hazırda aldığı maaşın azaldılması təklifinə də razılıq vermir. İllik maaşı 17 milyon avro olan niderlandlı komandanın ən yüksək ödənişli oyunçusudu. Bir məqamı da xatırladaq ki, “Barsa”nın ona 20 milyon avro borcu da var. Əlbəttə, De Yonqun qalması da mümkündü. La Liqa oyunlarının teleyayın hüququnu 400 milyon avroya satmaq mümkün olsa, klub niderlandlını saxlaya bilər. Bu gün üçün ən optimal variant isə hər iki niderlandlının komandadan ayrılmasıdı. Belədə həm ən azı 100 milyon avro gələcək, həm də maaş tavanı aşağı düşəcək. Axı hələ Robert Levandovskinin transferini də qeydiyyatdan keçirmək lazımdı. Üstəlik “Barsa”nın qarşıdakı günlərdə Jül Kundenin transferini bitirəcəyi ilə bağlı da xəbərlər gəzir.

Benzemasız

Start heyətləri elan olunarkən gözə dəyən ilk məqam meydanda heç nə ilə yadda qalmayan Levandovskinin debütü yox, Benzemanın görünməməsi idi. Fransalının adı iştirak ərizəsinə salınmamışdı. Belədə Azar hücumun mərkəzində özünü göstərmək imkanı qazandı. Elə madridlilərin yarımmüdafiəsinin Kamavinqa, Çuameni və Valverden ibarət yenilənmiş versiyasını da ilk dəfə iş başında gördük. Məhz elə uruqvaylı oyundakı ilk təhlükəli vəziyyəti yaratdı, sadəcə, onun cərimə meydançası xaricindən vurduğu zərbə dirəyə dəydi. Kamavinqa isə az qala heç nədən komandasının qapısına qola səbəbkar olacaqdı. Həmin epizod Fatinin qeyri-dəqiq zərbəsi ilə boşa verildisə, “Barsa”nın aqressiv pressinqi bir neçə dəqiqədən sonra hesabın açılması ilə nəticələndi. Bugünlərdə “Real”dan müqaviləni yeniləmək təklifi alan Eder Militao təzyiq altında büdrədi ki, bu da Rafinyanın topu “9-luğ”a “sancması” üçün kifayət etdi. Bəlkə də qol bir qədər təsadüfi alındı. Ancaq oyunun axarına tam uyğun idi. Kataloniyalılar daha yaxşı oynayırdılar, Rafinya isə La Liqanın yeni mövsümünün ulduzu statusuna iddiasını ortaya qoydu. Braziliyalının qolu madridliləri ayıltdı, meydanda qığılcım qopdu və hissənin ortalarında bütün oyunçuların qatıldığı dava-dalaş düşdü. İkinci hissənin başlaması ilə kütləvi əvəzetmələr izlədik, ancaq bu məqam oyunun xarakterini qətiyyən dəyişmədi. “Barsa” həm topa nəzarət edirdi, həm də ərazi üstünlüyünə malik idi. “Real” ÇL-in son qalibi olduğunu göstərməyə çalışsa da, bacarmadı. Marko Asensio epizodların birində Lukas Vaskesin gözəl ötürməsini boşa verdi. Madridlilər daha çox Tibo Kurtuanın sayəsində sona qədər məğlubiyyətdən qaçmaq şansını qorudular. Belçikalı qapıçı təkbətək çıxan Kessyenin qarşısını aldı, eləcə də Dembelenin iti bucaq altından zərbəsinə reaksiya verdi. Mariano Dias isə hələ Benzema deyil. 90-cı dəqiqədə o da əlverişli imkanı qaçırdı. Martda olduğu kimi, bu dəfə də “Real” Benzemanın yoxluğunda kataloniyalılara “quru” hesabla uduzdu. Düzdü, bu, yoxlama oyunu idi. Ancaq Las-Veqasdakı qarşılaşmanı izləyənlər bundan sonra məhz “Barsa”nın üç həftədən sonra start götürəcək İspaniya çempionatının favoriti olduğunu düşünməyə başladılar.

Real – Barselona 0:1

“Real”: Kurtua, Lukas Vaskes (Odriosola, 71), Eder Militao (Valyexo, 62), Rüdiger (Mendi, 46), Alaba (Naço, 46), Valverde (Modriç, 46), Çuameni (Kroos, 46), Kamavinqa (Kazemiro, 46), Rodriqo (Sebalyos, 70), Vinisius Junior (M.Dias, 70), Azar (Asensio, 46).
“Barselona”: Ter Ştegen (İnyaki Penya, 62), Arauxo (Dest, 63), Erik Qarsiya, Kristensen (F. de Yonq, 46), Jordi Alba (Aleks Balde, 46), Qavi (Kessye, 46), Buskets (Niko Qonsales, 63), Pedri (Serxi Roberto, 63), Rafinya (Depay, 63), Levandovski (Obameyanq, 46), Ansu Fati (Dembele, 46).
Qol: Rafinya, 27.

Vərəqələr: Kristensen, 34. Jordi Alba, 43. Buskets, 54. Lukas Vaskes, 65. Kessye, 74 – sarı.

Hakim: Allatin (ABŞ).

24 iyul. Las-Veqas. “Allicant” stadionu.