“Napoli” ən yaxşı bombardirindən imtina edib: Dris Mertens “Napoli”ni tərk etməli olub.

Football-plus.az xəbər verir ki, İtaliya klubunun rəhbərliyi belçikalı hücumçu ilə müqaviləni yeniləməyi lazım bilməyib. 35 yaşlı Mertens komandada 2013-cü ildən çıxış edirdi. O, 397 oyuna vurduğu 148 qolla “Napoli” tarixinin ən yaxşı bombardiridi.

Son xəbərlərdə Neapolu tərk etsə də, Drisin İtaliyada qala biləcəyi qeyd edilir. Yerli mənbələr onun xidmətində “Latsio” və “İnter”in maraqlı olduğunu xəbər verir. Bir neçə il əvvəl “Napoli”ni çalışdıran Mauritsio Sarrinin indi onu yenidən sərəncamında görmək istədiyi, belçikalının 4-3-3 taktiki sxeminə uyğun olduğu bildirilir. Onun “İnter”ə mümkün keçidi isə yalnız Aleksis Sançesin bu klubu tərk etməsindən sonra mümkün ola bilər.

Yeri gəlmişkən, “Verona”nın hücumçusu Covanni Simeone iş yerini dəyişəcək. “Corriere dello Sport” qəzetinin xəbərinə görə, o, “Napoli” ilə razılığa gəlib. “Atletiko”nu çalışdıran Dieqo Simeonenin oğlu olan Covanni ötən mövsüm A seriyasında “Verona”nın ən yaxşı bombardiri olub. Argentinalı futbolçu bu liqada 35 oyuna 17 qol vurub. “Transfermarkt” potalı 26 yaşlı hücumçunun dəyərini 17 milyon avro qiymətləndirir.