La Liqa klubları uzun sürən koronavirus pandemiyasından sonra normal həyata qayıtmaqdadılar. İspaniya təmsilçiləri son illərdə ilk dəfə mövsümöncəsi hazırlığın tərkib hissəsi kimi bütün dünyada çoxlu yoldaşlıq oyunu keçirməyi planlaşdırıb. Bir tərəfdən fiziki formanı qaydaya salacaqlarsa, o biri tərəfdən baş çəkəcəkləri ölkələrdə populyarlıqları artacaq. Aşağıda La Liqa klublarının yay planları ilə tanış ola bilərsiz.
“Atletik” mövsümöncəsi hazırlığı əsasən Almaniyaya (iyulun 16-23-ü aralığında) alıb. Bilbaolular iyulun 17-də Ənənələr kuboku çərçivəsində Münhenqladbax “Borussiya”sı və “Duysburq” ilə oynayacaqlar. Ardından baskları “Bohum” (21 iyul) və “Maynts-05” (23 iyul) ilə oyunlar gözləyir. Nəhayət, “Atletik” sonuncu mövsümöncəsi yoldaşlıq oyununu iyulun 30-da “Sent-Ceyms Park”da “Nyukasl”a qarşı keçirəcək.
“Atletiko” iyulun 30-da Norveçə yollanacaq ki, Oslodakı “Ullevoll” stadionunda “Mançester Yunayted”lə qarşışaşsın.
“Barselona” mövsümün startına qədər 6 yoldaşlıq oyunu keçirməyi planlaşdırır. Bunlardan ikisi Kataloniyada, qalanı isə ABŞ turnesi çərçivəsində keçiriləcək. Xavinin komandası iyulun 13-də aşağı dəstə təmsilçisi “Olot”, 19-da isə okeanın o tayına adlayaraq Devid Bekhemin yaratdığı “İnter Mayami” ilə qarşılaşacaq. Bundan sonra “Barsa” Las-Veqasa yollanacaq və iyulun 23-də orda “Real”la oynayacaq. 3 gün sonra – iyulun 26-da Dallasda “Yuventus”la oyun keçiriləcək. “Blauqraba” mövsümöncəsi hazırlığın Amerika mərhələsini iyulun 30-da Nyu-Yorkda – “Nyu-York Red Bullz”a qarşı oyunla bitirəcək. Komanda ardından evə dönəcək və avqustun 7-də Xuan Qamper kuboku uğrunda oyunda Meksika “Pumas”ı ilə qarşılaşacaq.
“Rayo Valyekano” əvvəlcə (16 iyul) “Avropa-Park”da “Frayburq”la oynayacaq, ardından Avstriyada “Salernitana” (19 iyul) və “Hillsboro”da “Şeffild Uensdey” ilə qarşılaşacaq. Hazırlıq iyulun 31-də “Old Trafford”a MY-yə qarşı oyun ilə bitəcək.
Meksikaya yollanacaq “Selta” iyulun 13-də “Pumas”la gücünü sınayacaq. Viqolular bir neçə gün sonra Kaliforniyada “San-Xose” ilə oynayacaq, iyulun 29-da isə Portuqaliyada “Braqa” ilə görüşəcək.
“Espanyol” iyulun 30-da “Ameks” stadionunda “Brayton”la qarşılaşacaq.
“Malyorka” Avstriyada toplanış keçəcək. Adalıların rəqibləri “Veçjustoy Krakov” (16 iyul), Qətər yığması (19 iyul) və “Cenoa” (22 iyul) olacaq.
“Osasuna” iyulun 30-da “Avroborq”da “Qroningen” ilə oynayacaq.
“Betis” mövsümöncəsi tsiklə Avstriyada “Qrediq”ə qarşı (16 iyul) keçirəcəyi oyunla başlayacaq. Ardından “Filips” stadionunda PSV ilə oyun (23 iyul) olacaq. “Xiyarlar” həmçinin Böyük Britaniyaya yollanaraq, Çesterfilddə “Marsel” (27 iyul) “Brentford”un stadionunda isə bu komanda ilə (30 iyul) qarşılaşacaq.
“Real” ABŞ-da keçiriləcək “Soccer Champions Tour” turnirinə qatılacaq. Madridlilər yuxarıda xatırlatdığımız “Barselona”ya qarşı oyunla yanaşı, San-Fransiskoda “Amerika” (27 iyul) və Los-Ancelesdə “Yuventus” (30 iyul) ilə üz-üzə gələcək.
“Real Sosyedad” iyulun 16-da “Tuluza”, iyulun 23-də Münhenqladbax “Borussiya”sı, iyulun 30-da isə “Bornmut”la səfərdə oynayacaq.
“Sevilya” iyulun 7-də Cənubi Koreya toplanışına başlayıb. İyulun 17-nə qədər orda qalacaq komanda 16-da “Tottenhem”lə qarşılaşacaq. Ardından Portuqaliyaya yollanacaq sevilyalılar iyulun 24-də “Sportinq”lə oynayacaq. İyulun 30-na Xose Antonio Reyesin xatirəsinə həsr olunan “Arsenal”la oyun, 31-nə isə “Lester”lə qarşılaşma planlaşdırılır.
“Almeriya” avqustun 7-də İngiltərədə Səudiyyə Ərəbistanının çempiony “Əl-Hilal”la üz-üzə gələcək.
“Valensiya” mövsümöncəsi hazırlığa iyulun 18-də Avstriyada Dortmund “Borussiya”sına qarşı keçirəcəyi oyunla başlayacaq. “Yarasalar” iyulun 23-də Almaniyaya baş çəkəcəklər ki, “Ştutqart”la qarşılaşsınlar.
“Vilyarreal”ın qrafiki maksimum dərəcədə sıxdı. “Sarılar”ı əvvəlcə Portuqaliyada “Sportinq”lə oyun (14 iyul) gözləyir. İki gün sonra Niderlandda PSV ilə oynayacaqlar. Ardından Dortmund “Borussiya”sı ilə Avstriyada (22 iyul) və “Reyms” ilə Fransada (26 iyul) oyunlar planlaşdırılıb. Hazırlığa İngiltərədə “Sauthempton” (30 iyul) və “Fulhem”ə (31 iyul) qarşı keçiriləcək oyunlarla yekun vurulacaq.