Polşanın ”İnteria Sport” nəşri Çempionlar Liqasının 1-ci təsnifat mərhələsində baş tutan “Lex” - “Qarabağ” (1:0) matçı ilə bağlı maraqlı məqalə hazırlayıb.

Football-plus.az “Lex” “Qarabağ”ı məğlub etdi! Qisas üçün böyük şans yaranıb!” adlı yazını təqdim edir:

Avrokubokların, o cümlədən Çempionlar Liqasının qrup mərhələsinin iştirakçısı, “Lex”dən daha yüksək reytinqli olan “Qarabağ” Poznanda keçirilən görüşün böyük hissəsində Polşa çempionundan daha yaxşı çıxış etdi. Bununla belə, onlar səmərəsiz və praqmatik idi. Azərbaycan çempionunu 1:0 hesabı ilə məğlub etmək Çempionlar Liqasında mərhələ keçmək uğrunda mübarizədə irəli düşmək və Polşa komandalarının bu rəqiblə kabus seriyasını qırmaq üçün şansı yaradır. Beləliklə, qanadlarımızı açmaq üçün vaxt olacaq, bəlkə sonra, bəlkə başqa bir rəqiblə. Axı 8 ildi fasiləsiz avrokukuboklarda iştirak edən komanda “Lex”lə qarşılaşmanın favoriti idi. Düzdü, bukmeker kontorları fərqli mərc edirdilər, Polşa çempionunu üstün görürdülər. Amma matçın gedişi sanki onların yanıldığını göstərirdi. Quşa görə oyunun yarımçıq dayanması maraqlı məqam idi. Hər iki komandanın oyunçuları onu karton qutuya qoymağa çalışırdı. Bu, işarə idi. Nə quşun, nə də oyunda “Lex”in qanadları açılırdı. Bu, müəyyən mənada rəmzi hadisə idi. Çünki quş meydana girənə qədər Poznan klubu azərbaycanlıları hədələyən heç nə ilə yadda qala bilmədi. Bəli, “Lex” oyuna daha istəkli başladı. Lakin tezliklə məlum oldu ki, qafqazlı futbolçuların oyunu sanki bir az daha yaxşı alınırdı. Onlar topa daha çox nəzarət edirdi. “Lex”ə aşiq olan azarkeşlər başverənləri həyəcanla izləyirdi. İlahi, “Qarabağ” necə hücumlar qurur, necə səbirli və metodik hərəkət edirlər. Braziliyalı Kadi Borges nələr bacarır? İbrahima Vacinin CV-sində ancaq Rumınya və Almaniya aşağı liqalarında çıxış edən klublar yer alıb.

“Lex”in cinahlarında isə fərqlilik hökm sürürdü. Yakub Kaminskinin Almaniya klubuna satılmasından sonra böyük ümidlərlə “Lex”ə gətirilən gənc Mixal Skuras özünü yaxşı tərəfdən göstərdi. Digər tərəf - sol cinah isə fiasko idi. Kristoffer Velde, sadəcə, biabırçı oyun sərgiləyirdi. Ona xərclənən 1 milyona dəymədiyini göstərdi. Joao Amaral isə uğurlu çıxış etdi. Buna baxmayaraq, hesabı “Lex” açdı. Geri çəkilərək müdafiə olunan Poznan klubu əks-hücumda istəyinə çatdı. Mikael İshak qartal kimi “Qarabağ”ın cərimə meydançasına şığıyaraq müdafiəçiləri şikara çevirdi. Budu, “Lex” 1:0 öndədi. Poznan təmsilçisi tabloda üstün olsa da, oyuna nəzarət edə bilmirdi. Hər iki komandanın zəif orta xətti matçı paradoksal tərzdə sürətləndirirdi. Meydanın mərkəzində başqa, cinahlarda fərqli ab-hava hökm sürürdü. Mərkəzdəki laqeyd yarımmüdafiəçilər sayəsində 1-2 ötürmədən sonra komandalar hücuma keçirdi. Azərbaycanlılar daha çox belə şans əldə edirdi. Poznan təmsilçisi Qafqazdan olan rəqibinin səhlənkarlıqlarından istifadə edə bilərdi. Mikael İshak isə azərbaycanlı qapıçı Şahruddini tez-tez narahat edirdi. Matçın 66-cı dəqiqəsində gənc Filip Şimçak əla fürsəti boşa verdi. O, özünün və azarkeşlərin gecələr xəyal etdiyi şansın üstündən xətt çəkdi. Bundan sonra isə “Qarabağ” daha çox topa nəzarət etməyə başladı. Lakin “Lex” boyun əymədi, çətin mübarizədə qələbə qazana bildi. Bəlkə də bu, “Qarabağ”ın indiyə kimi mübarizədən kənarlaşdırdığı Polşa təmsilçilərinin qisası idi. Ümid edək ki, “Lex” “Pyast”, “Visla” (Krakov) və “Legiya”nın yolu ilə getməyəcək.

İLKİN SULTANLI hazırladı