Bəli, “Qarabağ” Poznanda qalib gəlməliyidi, ən azı üstün olduğu, daha dəqiq desək, ərazi üstünlüyünə yiyələndiyi matçdan cavab görüşü ərəfəsində sərfəli nəticə ilə dönməliydi.

Ancaq onu da unutmayaq ki, rəqib ölkəsinin son çempionu, təxminən bir ay əvvəl futbolçusunu 10 milyon avroya Almaniya klubuna satan Polşa təmsilçisi idi. Həmin klub ki, dünya futboluna Robert Levandovski kimi ulduz bəxş edib. Həmin Levandovski ki, mövsümlərarası fasilədə “Bavariya” ilə “Barselona” arasında müharibəyə səbəbkar olub. Fantastik transfer məbləği ilə bağlı söz-söhbət dolaşır.

Kim nə deyir-desin, kim necə qəbul edir-etsin, Azərbaycanda təkrarçılığın boy atdığına, srağagün keçirlən oyundan sonra geniş vüsət aldığına bir daha şahid oldum. “Qarabağ”ın “Lex”ə minimal hesabla məğlub olduğu ilk görüşdən sonra hamı bir nəfər kimi qabağa düşənin yazdığını təkrarlamaqla guya futboldan anlayışı olduğunu sosial şəbəkələr vasitəsi ilə sübut etməyə çalışdı. Məşhur meyxanada deyildiyi kimi: “dilimizdə bir şüar var” məsələsi təkrarlandı. Hamı birağızdan Patrik Andadenin yoxluğunu qabardıb, Qurban Qurbanovun çalışdırdığı komandanın məhz bu səbəbdən uduzduğunu sübut etməyə çalışdı.

Bəli, Andade Ağdam təmsilçisi üçün önəmli fiqur idi, ancaq vazkeçilməz deyildi. “Qarabağ”ın əsas siması ötən mövsüm premyer-liqanın “ən yaxşısı” seçilən Kadi Borges idi ki, məhz o da Poznandakı matçda ən “zəif bənd” idi. Çoxları Zubirin zəif oyun sərgilədiyini qabardır, Andradenin yerinin göründüyünü qeyd edir. Ancaq nədənsə heç kim Kadinin zəif oyununu qabartmır, kimsə Braziliya-Polşa qarışığı olan yarımmüdafiəçinin artıq çəkisinin olduğunu vurğulamır. Yenə deyirəm, ötən “futbol ili”nin ən yaxşısı Patrik yox, Kadi olub. Andrade komandası üçün vazkeçilməz ad idisə, nəyə görə Kadi mövsümün ən yaxşısı seçildi? Deməli, son məğlubiyyəti Andaradenin adına yazmaq bəhanədən başqa bir şey deyil.
Oyundan sonra sosial şəbəkələrdə paylaşılan statuslara da toxunmaq istəyirəm. Açığı, onların sayı o qədər də çox deyildi. Yazılanların da müəllifləri bir qədər ehtiyatlı davranıb, “Qarabağ” rəhbərliyinin, baş məşqçinin acığına gələn formada paylaşımlar edib. Bəli, Qurban bəy yerli məşqçilər arasında “bir nömrə”di, ancaq bu o demək deyil ki, o səhvsiz mütəxəssisdi. Sadəcə, futbol yazarları arasında elə vəziyyət yaşanır ki, heç kim Qurban bəyin qərarlarına etiraz etməyə, onun səhvlərini yazmağa özündə cəsarət tapmır. Cəsarət tapanlar da səhvləri qeyd edib sonda özünü “sığortalamaq” üçün gəlişigözəl sözlərdən yararlanır.

Bəli, “Qarabağ” səfərdə “Lex”dən üstün oyun sərgilədi ki, bunu statistika da göstərir. Ancaq əlahəzrət statistika da həmişə özünü doğrultmur. Maksim Medvedev mərkəz müdafiəçisi kimi özünü doğrultmadığı kimi. Sənin sərəncamında Bədavi Hüseynov kimi stopper olduğu halda Maksimi müdafiənin mərkəzinə çəkmək vaxtı ötmüş meyvəni parıldadıb vitrinə qoymağa bənzəyir. Hörmətli Qurban bəy, Maksimi məcburiyyətdən mərkəz müdafiəçisi oynatmaqla Çempionlar Liqası kimi mötəbər turnirin qrup mərhələsinə vəsiqə qazanmaq qeyri-mümkündü. Heç bu addımla Avropa Liqasının qrupuna da getmək olmaz. Maksimə hörmətiniz varsa, başqa yolla onu göstərin. Futbolu sevən azərbaycanlılara isə etibarlı, cinahdan gələn ötürməyə vaxtında reaksiya verən müdafiəçi lazımdı.

RƏŞAD