Maksim Medvedev - “Qarabağ”ın və milli komandanın kapitanı haqda çox danışmağa ehtiyac yoxdu.

Uzun illərdi ölkə futbolunda əziyyət çəkir. Müxtəlif vaxtlarda möhtəşəm çıxışı ilə yadda qalıb. Düzdü, bəzən olub ki, ictimaiyyət, azarkeşlər onu qınayıb. Lakin Maksim həm millidə, həm də “Qarabağ”da ən yaxşılar sırasında olub. Son mövsümdə də özünü yaxşı tərəfdən göstərdi. Konfrans Liqasında, premyer-liqada və kubokda ümumilikdə 36 matçda meydana çıxdı. Bu görüşlərdə 1 qol vurdu, 1 məhsuldar ötürmə etdi. Görünən budu ki, Maksim hələ də “Qarabağ”ın vazkeçilməzlərindədi.

Həm premyer-liqanın, həm də kubokun mükafatlandırma mərasimində müdafiəçi həddən artıq sevincli idi. Görəsən, bunun səbəbi nədi? Bəlkə Medvedev karyerasını bitirir? Suallarımız çoxdu, cavablar isə bəlli deyil. Qaranlıq məsələlərə aydınlıq gətirməsi üçün Maksimlə əlaqə saxladıq.

- Birillik fasilədən sonra, sona 3 tur qalmış çempion olduz. Azərbaycan kubokunda da qələbə qazandız. Uzun müddət idi “qızıl dubl” edə bilmirdiz. Nələr hiss edirsən?

- Çempionluq hamıya nəsib olmur. Bu mənim 8-ci belə sevincimdi. Ötən il bunu bacarmadıq. Bu səbəbdən də bütün enerjimizi sərf etdik ki, hərtərəfli tarix yazaq. Konfrans Liqasında uğurlu çıxış etdik, həm çempion, həm də kubokun qalibi olduq. Çalışacağıq ki, Çempionlar Liqasında da uğur əldə edək. Hələ ki karyeramı davam etdirirəm. Bundan sonra da çalışacağıq ki, hər il çempion olaq.

- Ötən il “qızıl oyun”da “Neftçi”yə məğlub olandan sonra həm Qara, həm də sən çox üzgün görünürdüz. Bu mövsüm sanki həmin uğursuzluğun acığını çıxırdız...

- Biz heç vaxt, heç kimdən acıq çıxmırıq. Sadəcə, öz yolumuzu gedirik. Yüksəyə tullanmaq istəyirsizsə, bir az oturmaq lazımdı. Bizdə də belə oldu.
Düzdü, həmin görüşdə uduzaraq gümüş medal qazandıq. Amma Konfrans Liqasında tarix yazdıq. Yəni Allah nəyisə alanda daha yaxşısını verir. Bu il çempion, kubokun qalibi olduq. Hələ qarşıda Çempionlar Liqasının oyunları var. Düşünürəm ki, bu turnirdə də yaxşı nəticələr əldə edib, azarkeşlərimizi, Azərbaycan xalqını sevindirəcəyik.

- Bir çoxları düşünür ki, hazırkı “Qarabağ”ın heyəti Çempionlar Liqasına vəsiqə qazandığı dövrdəkindən güclüdü. Sən həm o, həm də bu komandada var idin. Müqayisə etsək, hansı daha güclüdü?

- Yaxşı komandamız var. Bütün futbolçuların potensialı yüksəkdi. Hiss edirəm ki, bu komanda ilə daha yaxşı nəticələr əldə edə bilərik. Bütün uğurları qazanmağa cəhd edəcəyik. Ümid edirəm ki, daha yaxşı nəticələrə imza atacağıq.

- Belə başa düşdüm ki, rəhbərlik, baş məşqçi qarşınıza hədəf qoymasa da, özünüz Çempionlar Liqasının qrupuna düşmək haqda düşünürsüz...

- Hər futbolçunun fərqli arzusu olur. Lakin komanda olaraq qarşımıza məqsəd qoymuşuq ki, Çempionlar Liqasının qrupuna vəsiqə qazanaq. Ümid edirik ki, bunu bacaracağıq. Bu istək var bizdə. Arzularımızın arxasınca getməliyik. Daim işləyib, əziyyət çəkib məqsədlərimizə çatmalıyıq. Baş məşqçinin tapşırıqlarına qulaq asmalıyıq. Rejimi pozmamalıyıq. Hər şeyi vaxtı-vaxtında, yerində etməliyik.

- “Futbol+”ə müsahibələrinin birində qeyd etmişdin ki, dünya çempionatının seçmə mərhələsi bəlkə də sənin üçün sonuncu olacaq. Millətlər Liqasının oyunlarından sonra milli karyeranı bitirmək haqda düşünürsən?

- Belə görünür ki, bu, yığmada sonuncu ilimdi. Çünki fiziki cəhətdən çətinlik çəkirəm. İki “cəbhə”də mübarizə aparmaq mənim üçün ağırdı. Bütün fikrimi “Qarabağ”a yönəltmək istəyirəm. Çünki avrokuboklarda, premyer-liqada və kubokda mübarizə aparırıq. Sonra da millinin oyunlarına çıxırıq. Mövsüm ərzində boş vaxtım, istirahət üçün zamanım olmur. İndi də eyni söhbətdi. Milli komandanın düşərgəsindən qayıdandan sonra 4 günüm olacaq istirahət üçün. Sonra da yollanacam Avstriyaya. Etiraf edirəm ki, 33 yaşımda çatdırmıram.

- Qarşına qoyduğun hansı hədəfin qalıb ki, karyeranı bitirəsən?

- Məqsədlərim çoxdu. Amma zaman azdı. Artıq 33 yaşım var. Gələn il bir az da yaşlaşacam. Hiss olunacaq ki, artıq karyeramın sonuna doğru gedirəm.

- Məşqçilik etmək haqda düşünürsən?

- Hələ yox! Sabit oynayıram. Karyeramı bitirəndən sonra bir az fasilə etmək fikrindəyəm.

- Builki uğurları kimə həsr edirsən?

- Azarkeşlərimizə! Daim bizim yanımızda idilər. Hər oyunda dəstək oldular. Bu il onlar bizdən daha yaxşı və möhtəşəm idilər. Ümumiyyətlə, “Qarabağ”ın qazandığı bütün uğurları həmişə yanımızda olan azarkeşlərimizə həsr edirəm.

İLKİN SULTANLI