AFFA-nın İcraiyyə Komitəsinin aprelin 29-da keçirilən iclasında bir neçə vacib qərar qəbul olunmuşdu.

Öncə onları nəzərdən keçirək:

1. 2022/23 mövsümündən etibarən "İmişli", "Mingəçevir" və "Araz-Naxçıvan" komandaları 1-ci divizionda çıxış etsin.
2. Azərbaycan çempionatında legioner limitinin “6+5” sistemi ilə tətbiqi davam etdirilsin.
3. Premyer-liqada gənc futbolçular üçün yaş limiti ləğv olunsun.
4. Azərbaycan çempionatında əvəzetmə sayı dəyişdirilməsin (3 əvəzetmə sayı saxlanılsın).
5. 2022/23 mövsümündən etibarən klublar sifariş ərizəsinə 14 legioner futbolçu daxil edə bilər. 14 legionerdən əlavə hər legioner üçün sifariş ödənişi 50 min amanat müəyyənləşdirilsin.
6. 2023/24 mövsümündən etibarən klublar sifariş ərizəsinə 12 legioner futbolçu daxil edə bilər. 12 legionerdən əlavə hər legioner üçün sifariş ödənişi 50 min manat müəyyənləşdirilsin.
7. AFFA-nın Yoxlama və Təftiş Komitəsinin Əsasnaməsinin hazırlanması baş katibliyə tapşırılsın. Əsasnamə 1 ay ərzində İcraiyyə Komitəsinə təqdim olunsun.

Ancaq görünüən budu ki, 2 və 4-cü bəndlər komitənin ürəyincə olmayıb. Buna görə də mayın 31-də İcraiyyə Komitəsi növbədənkənar iclas keçirərək qərarlarda dəyişiklik edib. Belə ki, ölkə çempionatının 2022/23 mövsümündən etibarən legioner limiti “7+4” sisteminə əsasən nizamlanacaq. Bundan əlavə, klublar 5 əvəzetmə etmək imkanına sahib olacaq. Görəsən, cəmi 1 ay sonra qərarlar niyə dəyişdi? Legioner limitinin artırılmasının milli komandamıza təsiri necə olacaq? Bu və bizi maraqlandıran başqa suallara cavab tapmaq üçün milli ilə Qazaxıstana yollanan AFFA-nın vitse-prezidenti və Məşqçilər Komitəsinin sədri Vaqif Sadıqovla danışmağı lazım bildik.

- İntizam Komitəsinin qərarları 1 ay sonra dəyişməsinə nə səbəb oldu? Legioner limiti və əvəzetmə sayı artırılacaqdısa, nə üçün aprelin 29-da edilmədi?

- Aprelin 29-da keçirilən iclasda balansı pozmamaq üçün “6+5” formatının və 3 əvəzetmə sayının saxlanılmasına qərar verdik. Bunun səbəbi imkanlı komandalarla maliyyə cəhətdən nisbətən zəiflər arasında uçurum yaranmasının qarşısını almaq idi. Bu zaman rəqabətsiz bir çempionatın şahidi ola bilərdik. Maddi vəziyyəti aşağı olan klublar nə legioner gətirə, nə də yaxşı transfer edə bilərdi. Ancaq mayın 31-də baş tutan iclasda tam fərqli məruzələr oldu. Bildirildi ki, bütün klublar üçün maliyyə dəstəyi ehtimalı çox böyükdü. Çempionatı bundan da zəngin və daha çox rəqabətli etmək mümkündüsə, “7+4” legioner limitini və 5 əvəzetmə sistemini müzakirəyə çıxaraq. Müzakirə etdik və uğurlu olacağı düşünüldüyündən qəbul olundu. Təbii ki, bu birdən-birə baş vermədi. Suallar qoyuldu ki, premyer-liqaya yeni gələnlər və büdcəsi az olan komandalar heyətə əcnəbi futbolçu cəlb edə bilərmi?

Maliyyə durumları buna imkan verəcəkmi? “Hə” cavabı aldıqdan sonra qərar qəbul olundu.

- Milli komandaların baş məşqçiləri həmişə yerli oyunçu seçiminin azlığından şikayətlənib. Yeni tətbiq olunan limit bu seçimi daha da azaltmır?

- Bilirsiz, gec-tez elə bir sistemə gəlməliyik ki, futbolumuzda rəqabət olsun və meydanda güclü futbolçular yer alsın. Bunun üçün də İcraiyyə Komitəsinin iclasında bildirdiyim kimi, vahid sistemə gəlməliyik. Bu sistem 3 liqanı özündə cəmləşdirəcək: premyer-liqa, 1-ci divizion və əvəzedicilərin çempionatı. Elitada oynamaq imkanı olmayan futbolçular ən azı bu liqaların birində çıxış edə bilsinlər. Buna görə planlı şəkildə işlər görülməlidi. Mayın 31-də bu məsələ də İcraiyyə Komitəsinin iclasında müzakirə olundu. Orda da bizə deyildi ki, ola bilsin, qısa müddətdə - 1 ilə bu sistemin tətbiqi həyata keçirilsin. Həmçinin premyer-liqadan düşən və diviziondan elitaya qalxan komandaların olması da bu sistemin əsas tələblərindəndi. Bir şeyi də bildirim ki, futbolçu məşqdə yox, oyunda inkişaf edir. Ona görə də hardasa qapılar bağlananda, gənc oyunçular üçün hardasa qapı açmalıyıq. Divizionda isə limit “6+5” olaraq qalır. İnşallah, 1 ildən sonra 3 peşəkar liqanın şahidi olacağıq.

- Əvəzetmə sayının artırılmasına nə səbəb oldu?

- Limitin dəyişməsinə görə bu addım atıldı. Klublarda maliyyə varsa, geniş heyətə malik olacaqlarsa, maliyyə dəstəyi də hər bir komanda üçün artırılacaqsa, çempionatımızı daha da rəqabətli hala gətirmək üçün əvəzetmə sayı da 3-dən 5-ə qaldırıldı. Aprelin 29-da klubların maddi durumları bilinmirdi. Ancaq indi ehtimal var ki, böyük maliyyə dəstəyi olacaq. Klublara da bu maliyyədən istifadə etmək imkanı yaradılacaq ki, heyətlərini həm yerli, həm də legioner futbolçularla gücləndirə bilsinlər. Bildiyiniz kimi, artıq “Sumqayıt”da da əcnəbi futbolçu transferinə icazə veriləcək. Amma indiyədək buna imkan yox idi. “Səbail” 3-4 legioner futbolçu oynada bilirdi büdcəsinə görə. Lakin indi bildirildi ki, yeni maliyyə dəstəyində hər kəsə eyni gözlə baxılacaq.

- “Xan Lənkəran”la “Cəbrayıl” 1-ci divizionda iştirak üçün hələ də müsbət cavab gözləyir. İclasda bu klublarla bağlı müzakirə oldu?

- İcraiyyə Komitəsinin aprelin 29-da baş tutan iclasında bu klublarla bağlı müzakirə oldu. Ancaq bildiyiniz kimi, Əsasnaməyə görə “Xan Lənkəran”la “Cəbarayıl”ın 1-ci divizionda iştirakı üçün 3 il Region Liqasında çıxış etmələri lazımdı. Son iclasda, ümumiyyətlə, bu klublarla bağlı müzakirə olmadı.

- PFL rəhbəri Ramin Musayev açıqlamasında premyer-liqada çıxış edəcək bütün klublara eyni məbləğdə yardım ayrılacağını söylədi. Bu dəstəyi kim verəcək? Məbləğ nə qədərdi?

- Bilsəydim, sizə ilk gündən deyərdim (gülür). Ancaq bunu söyləyə bilərəm ki, bütün klublara eyni həcmdə maliyyənin ayrılması ehtimalı çox böyükdü.

SƏNƏM FƏRHADOVA