''Nyukasl'' yayda hay-küylü transferlər etməyəcək?
Səudiyyə Ərəbistanlıların himayəsinə keçdikdən və qış transfer dönəmində yeni oyunçulara təxminən 100 milyon avro xərclədikdən sonra ''Nyukasl''ın yayda transfer bazarında ən fəal klublardan olacağı gözlənilirdi.
Amma klubun baş məşqçisi Eddi Hau bunun belə olmayacağını və pulları istədikləri kimi xərcləyə bilməyəcəklərini deyib: ''Yay transfer dönəmində hər kəsin bizdən hay-küylü keçidlər gözlədiyini bilirəm. Amma UEFA-nın nəzarəti altındayıq və ''maliyyə feyr-pleyi'' üzündən böyük pullar xərcləyəcəyimizi düşünmürəm. Ümumiyyətlə mənim üçün adlı-sanlı futbolçu almaq mühüm əhəmiyyət kəsb etmir. Mən məsələyə bir qədər fərqli cür baxıram. Ulduzları alıb komandaya yığmaq mənim iş prinsipimə ziddi. Mən yalnız sistemimə və komandaya uyğun olan oyunçuların alınmasının tərəfdarıyam''.
Qeyd edək ki, Haunun gəlişindən sonra ''Nyukasl'' yüksəlişə keçərək alt pillələrdən qurtulmağı bacardı. Komanda əvvəlki məşqçi Stiv Bryusla orta hesabla hər oyuna 0,45 xal toplayırdısa, Hau ilə bu rəqəm 1,3-ə bərabərdi. 44 yaşlı mütəxəssis həm də fevralda premyer-liqanın ən yaxşı məşqçisi seçilmişdi.
Digər xəbərlər
