“Qalatasaray”lılar, demək olar, bu həftəni Viktor Osimhendən xəbər gözləməklə keçirdi. Çünki çərşənbə axşamından etibarən bu mövzuda yeni xəbərlər gəlməyə başladı.

“Qalatasaray”ın 50, 60 və 65 milyon avroluq təkliflərini “Napoli” geri çevirəndən sonra Türkiyə çempionu, necə deyərlər, məsələni kökündən həll etməyə başladı. Sponsorlarına dəstəyi ilə nəhayət, neapollulara Osimhenin müqaviləsində qeyd olunan sərbəstqalma maddəsi, yəni 75 milyon avro təklif edildi!

İyulun 9-da tanınmış menecer Corc Qardi ilə “sarı-qırmızılar”ın başqan vəkili Abdulla Kavukcu İtaliyada görüntüləndi. Onlar italiyalı jurnalistlərə heç bir açıqlama vermədilər. Yalnız Qardi “Osimhenin transferi üçün əlimizdən gələni edirik” sözlərini dilə gətirməklə kifayətləndi. Elə həmin gün “Cim-Bom”un ikinci prezidenti Mətin Öztürk “bu transferin 48 saat ərzində bitəcəyini düşünürük” açıqlamasını verməklə fanatları bir qədər də həyəcanlandırdı. Tədricən klublar arasında aparılan danışıqların detalları da məlum olmağa başladı. “Napoli” “Qalatasaray”ın təklifini qəbul etsə də, mühüm bir şərt irəli sürdü. İtaliya çempionu Türkiyə çempionundan bankdan təminat sənədi tələb etdi.

Deyilənə görə, danışıqlarda Osimhen özü də görüntülü iştirak edibmiş. O, Səudiyyə Ərəbistanına yox, məhz “Qalatasaray”a keçmək istədiyini növbəti dəfə dilə gətirib. Ancaq divara sıxışan “Napoli” bu şərtindən vaz keçməyib. Bu komandanın “sarı-qırmızılar”ın qarşısına belə şərt qoyması təsadüfi deyil. 2014-cü ildə “Napoli” istanbullulara Qoran Pandev və Blerim Cemayli kimi futbolçuları satsa da, qarşı tərəfdən pulu çox ciddi gecikmə ilə ala bilmişdi. Ona görə də italyanlar indi özlərini “sığortalamaq” istəyirlər.

“Qalatasaray” təminat sənədi verməkdə çətinlik çəksə də, məsələni başqa yolla həll etməyi təklif edib. Abdulla Kavukçu “biz indi bunu etsək, başqa transferlərdə digər klublar da bizdən təminat sənədi tələb edəcək. Bu işin FİFA və UEFA tərəfi var. Biz onsuz da hər mövsümün əvvəlində borcumuzun olmaması ilə bağlı sənədləri bu qurumlara göndəririk” deyib. “Qalatasaray” 75 milyonun 15 milyonunu nəğd, qalan 60 milyonunu isə 4 il ərzində ödəməyi təklif edib. İstanbullular qarşı tərəfə “ödəməni qeyd etdiyimiz gündə etməsək, üstünə faizi gəlsin” təklifini irəli sürüblər.

Bu arada “Əl-Hilal”ın Osimhendən birdəfəlik vaz keçdiyi haqda xəbərlər də var. Yəni “Qalatasaray” artıq “döyüş meydanında” tək qalıb.