''Qalatasaray''lıların böyük səbirsizliklə transferinin bitməsini gözlədikləri Viktor Osimhen yeni paylaşımı ilə diqqət çəkib.

Nigeriyalı forvard gecə saatlarında ''instaqram''da ''Cim-Bom''luları daha da həyacanlandırıb. Osimhen hekayə bölümündə qızı ilə birlikdə ''Qalatasaray'' forması ilə çəkdirdiyi bir videonu paylaşıb.

Videoda ünlü futbolçu öz qızı ilə fanatlar arasında populyar olan ''üçlü çəkdirmə'' hərəkəti edir. Osimhenin bu videosu hələ mayın sonlarında çempionluğa həsr olunmuş tədbirdə çəkilib. 26 yaşlı futbolçunun bu paylaşımı danışıqların bitmək üzrə olması və ya artıq bitməsi kimi qiymətləndirilib.

Qeyd edək ki, ''Qalatasaray'' Türkiyə futbolu üçün inanılmaz səslənən 75 milyon avroluq təzminatı ''Napoli''yə ödəməyə razılıq verib. Sadəcə hissə-hissə. Amma italyanlar qarşı tərəfdən təminat məktubu tələb edib. ''Qalatasaray'' tərəfdən danışıqlarda iştirak edən Abdulla Kavukçu ilə menecer Corc Qardi Neapolda italiyalı jurnalistlər tərəfindən görüntüləniblər.

''Sarı-qırmızılar''ın ikinci prezidenti Mətin Öztürk iyulun 9-da verdiyi açıqlamada ''bu transferin 48 saat ərzində tamamlanacağını düşünürük'' ifadəsini işlətmişdi.