Bu yay artıq Din Höysen və Miloş Kerkez kimi futbolçularla vidalaşmaq məcburiyyətində qalan ''Bornmut'' daha bir önəmli futbolçusunu itirə bilər.

"Football-plus.az" xəbər verir ki, PSJ bu klubun üzvü İlya Zabarnıya ciddi maraq göstərir.

''Bornmut'' 22 yaşlı ukraynalı müdafiəçiyə görə Paris nəhəngindən 68 milyon avro tələb edib! Qeyd edək ki, ''Bornmut'' bu yay daha öncə Höyseni 62,5 milyon avroya ''Real''a, macarıstanlı cinah müdafiəçisi Miloş Kerkezi isə 47 milyon avroya ''Liverpul''a satıb. Yəni Zabarnı da qeyd olunan məbləğə Parisə yollansa, premyer-liqanın bu ortabab klubu bu yay təkcə bu 3 oyunçunun satışından 177,5 milyon avro qazanmış olacaq!

Ukrayna yığmasının da aparıcı üzvlərindən olan Zabarnı Kiyev ''Dinamo''sunun yetirməsidi. 2023-cü ildən ''Bornmut''un şərəfini qoruyan istedadlı müdafiəçi geridə qoyduğumuz mövsümdə 39 rəsmi oyuna çıxaraq aktivinə 1 məhsuldar ötürmə yazıb.

''Transfermarkt''da dəyəri 42 milyon avro göstərilən Zabarnının ''Bornmut'' ilə 2029-cu ilə qədər müqaviləsi var.