''Qalatasaray'' Osimhen ''bombasını'' partlatmaq üzrədi!
Viktor Osimhenin məsələsində ''Qalatasaray'' fanatlarını sevindirəcək yeni xəbərlər var.
Belə ki, ''Napoli'' ilə ''Qalatasaray'' arasında təzminat məsələsində anlaşma əldə olunub. Türkiyə çempionu neapolluların tələb etdiyi 75 milyon avronu ödəməyə hazırdı. 2-ci başqan Abdulla Kavukçu hazırda İtaliyadadı və qarşı tərəflə danışıqlar aparır.
İndi yeganə problem ödəmə planı ilə bağlıdı. ''Qalatasaray'' 75 milyon avronu 5 hissəyə bölərək ödəməyi teklif edib. Ən son xəbərlərdə ''Napoli''nin ''Qalatasaray''dan pulun ödəniləcəyinə dair təminat məktubu tələb etdiyi qeyd olunur. Bu məsələ də yoluna qoyulduqdan sonra transfer rəsmən açıqlanacaq.
Məşhur futbolçunun maaşına gəlincə, mətbuatda bu məbləğ 16 milyon avro kimi göstərilir. Bu pulun 10 milyon avrosu sponsorlar sayəsində ödəniləcək. Qalan məbləğ isə klubun büdcəsindən çıxacaq.
Maraqlıdı ki, ''Əl-Hilal''ın dördillik 160 milyon avroluq maaş təklifi hələ də belə desək, masanın üzərindədi. Ancaq Osimhen Səudiyyə Ərəbistanında oynamaq istəmir. O son anda qərarını dəyişməsə, ən qısa müddətdə ''Qalatasaray''la daimi əsasda müqavilə imzalayacaq. Bunu ''Cim-Bom''un 2-ci başqanı Mətin Öztürk də təsdiqləyib:
''Hər futbolçu ''Qalatasaray''a gəlmək istəyər. Biz Osimhen üçün son təklifimizi ''Napoli''yə göndərdik. Bu işin qarşıdakı 48 saat ərzində bitəcəyini düşünürük. Ancaq hər bir futbolçunun alternativi var. Osimhen özü də ''Qalatasaray''da oynamaq istəyir. Biz də onun klubumuzda qalmasını istəyirik''.
Tanınmış insayder Fabritsio Romano isə bu transfer haqda ''Osimhen artıq ''Qalatasaray''a keçməkdən bir addım uzaqlıqdadı'' ifadəsini işlədib.
Digər xəbərlər
