Türkiyəli məşqçi ikinci dəfə Rumıniya klubundan ayrıldı
Rumıniya təmsilçisi ''Petrolul''da Mehmet Topal dönəmi ikinci dəfə başa çatdı. Amma bu dəfə tərəflər birdəfəlik yolları ayırdılar.
Məşqçi karyerasına ötən il start verən Mehmet Topal dərhal özünü xaricdə sınamaq qərarına gəlmiş və Rumıniyaya yollanmışdı. ''Petrolul''un ciddi maddi problemlər yaşamasına baxmayaraq türkiyəli məşqçi yaxşı nəticələr qazanmağı bacarmışdı. Amma dekabrda o, rəhbərliklə fikir ayrılığı yaşayaraq gözlənilmədən istefa vermişdi. Onu Adrian Mutu əvəzləmişdi. Amma bizim futbolsevərlərə də ''Neftçi''dən gözəl tanış olan Mutu cəmi 2,5 ay sonra uğursuz nəticələr üzündən istefaya göndərilmişdi. Fanatların böyük israrı və tələbi üzündən rəhbərlik yenidən Mehmet Topala ağız açmalı olmuşdu. Bu məşqçi mövsümün sonuna qədər yenidən bu klubda işləməyə razılıq verərək Rumıniyaya qayıtmışdı. Amma təəssüf ki, avrokuboklara vəsiqə qazanmaq mümkün olmadı. Hərçənd buna görə birbaşa Topalı günahlandırmaq düzgün olmaz. Çünki klubda aylarla maaşlar və bonuslar ödənilmirdi. 39 yaşlı çalışdırıcının klubla birillik şərti müqaviləsi də var idi. Amma Mehmet Topal ayrılmağa üstünlük verdi.
O öz səhifəsində yerləşdirdiyi vida paylaşımında bunları qeyd edib:
''Həyatımda hər zaman özəl olaraq xatırlayacağım bir ili geridə qoydum. ''Petrolul''da yaşadıqlarımı heç vaxt unutmayacam. Həm meydanda, həm də ondan kənarda yaşadığım hər an, qurduğum dostluqlar, qazandığım təcrübə mənim üçün çox dəyərlidi. Bu klub böyük və sadiq bir azarkeş qazandı. Hər zaman ''Petrolul''u dəstəkləməkdə davam edəcəm. Klubun bütün işçilərinə, futbolçularıma, fanatlara, köməkçilərimə və mənə qucaq açan Rumıniya xalqına təşəkkür edirəm. Artıq yeni hekayələr yazmaq zamanıdı. Ancaq ''Petrolul'' hər zaman qəlbimdə qalacaq''.
Qeyd edək ki, Ployeşti şəhərinin təmsilçisi mövsümü 9-cu pillədə tamamladı və Mehmet Topalın başçılığı altında keçirdiyi 32 rəsmi oyundan 11 qələbə, 13 heç-heçə, 8 məğlubiyyətlə ayrılmış oldu.
Digər xəbərlər
