Məşqçi karyerasına yenicə start verən Mehmet Topal sürpriz qərarını açıqlayıb.

Türkiyəli mütəxəssis mövsümün əvvəlindən bəri çalışdırdığı Rumıniya təmsilçisi ''Petrolul''dan ayrıldığını bildirib. Halbuki bu komandanın işləri heç də pis getmirdi. ''Petrolul'' 16 komandalı Rumıniya çempionatında 21 oyunun cəmi 4-də uduzub və topladığı 31 xalla liderdən 6 xal geridə olmaqla 6-cı pillədə qərarlaşıb. Mehmet Topal ''instaqram''da etdiyi geniş paylaşımda istefanın şəxsi səbəblərlə əlaqəli olduğunu vurğulayıb.

Futbolçu kimi hər üç İstanbul nəhənginin şərəfini qorumuş 38 yaşlı Topal heç bir məşqçi təcrübəsinin olmamasına baxmayaraq yayda ''Petrolul''un təklifini qəbul etmişdi. Bu klubda müəyyən maliyyə problemləri mövcud idi və Topal mövsümün gedişində bir neçə dəfə bunu dilə gətirmişdi. Buna baxmayaraq Ploieşti şəhərinin təmsilçisi nəticələri ilə fanatlarını sevindirirdi.

ƏLİ