Növbəti dəfə ümidləri doğrultmayan və fanatlarına üzüntüdən başqa heç nə yaşada bilməyən ''Fənərbaxça''nın həm məşqçi, həm də futbolçular baxımından yoluna kimlərlə davam edəcəyi maraq doğurur.

Mətbuatda tez-tez komandada bu yay ''yarpaq tökümü'' yaşanacağı ilə bağlı xəbərlərə rast gəlmək olar. Xüsusilə əcnəbilərin bir çoxunun ayrılmaq ehtimalı var. Filip Kostiç, Milan Şkrinyar və Alan Sen-Maksimen zatən klubda icarədədi. Brayt Osayi-Samuel ilə Edin Cekonun müqavilə müddəti bitmək üzrədi. Dominik Livakoviç gözdən düşüb. Yussef Ən-Nəsiri ilə Sebastyan Şimanskiyə ciddi təkliflər var. Ancaq hansı futbolçuların qalacağının müəyyənləşməsi üçün ilk növbədə məşqçinin özünün qalıb-qalmayacağı bəlli olmalıdı. Joze Mourinyonun gələcək taleyi isə qeyri-müəyyəndi.

Bu arada yuxarıda adı sadalanan futbolçulardan birinin ayrılması demək olar, dəqiqləşib. Söhbət müqavilə ilə ''Yuventus''a məxsus olan Kostiçdən gedir. Turin nəhəngi təcrübəli futbolçunun tezliklə komandanın düşərgəsinə qayıtmasını istəyir. ''Yuve'' serbiyalının xidmətindən Klublararası Dünya Çempionatında yararlanmaq niyyətindədi. Bu turnirin iyunun 15-də start götürəcəyini nəzərə alsaq, Kostiç icarə müddəti tamam olmadan İstanbul nəhəngindən ayrılmalı olacaq. Çünki onun icarə müddəti iyunun 30-da bitir.

Düzdü, ''sarı-lacivərdlilər'' 32 yaşlı solaxay futbolçu ilə bağlı yekun qərarı verməyiblər. Az da olsa, ''Fənər''in onu daimi əsasda transfer etməsi ehtimalı var. Ancaq indiyə qədər bu mövzuda bir yenilik yaşanmayıbsa çətin ki, qalan qısa müddətdə nəsə yaşansın. Kostiç bu mövsüm ''Fənər''in heyətində iştirak etdiyi 33 qarşılaşmada 2 qol, 8 məhsuldar ötürmə ilə 10 qolun vurulmasında yaxından iştirak edib.