Superliqa klublarında, adətən, məşqçi istefaları diqqəti çəkirsə, son dönəmlərdə prezident istefaları da artıb.

Bilindiyi kimi, bir müddət öncə “Kayserispor”un xanım başqanı Berna Gözbaşı istefa vermiş və onu bu vəzifədə Əli Çamlı əvəzləmişdi. İndi də elitanın digər təmsilçisi “Qaziantep”dən şok xəbər gəlib. Həftəsonu “Fənərbaxça” ilə qarşılaşacaq bu klubda rəhbərlik tam tərkibdə istefa verib! Bura başqan Necdət Akınal və futbol şöbəsinin sədri İzzət Bakır da daxildi. Qeyd edək ki, “Qaziantep” əvvəlki illərdə Türkiyədə populyar klublardan olan, amma sonradan yanlış idarəçilik üzündən elitanı tərk edərək müflis elan olunan və faktiki fəaliyyətini dayandıran “Qaziantepspor”un davamçısı sayılır. Bu klub 2019-dan etibarən superliqadadı. Həmin vaxt klubun başqanı vəzifəsini Türkiyə Futbol Federasiyasının indiki prezidenti Mehmet Büyükekşi icra edirdi. Amma Büyükekşi 2021-də istefa verdikdən sonra həmin ilin mayında Cevdət Akınal başqan seçildi. Qəribədi ki, bir neçə həftə öncə, dəqiq desək, dekabrın 22-də “Qaziantep”də yeni seçki keçirilmiş və Cevdət Akınal növbəti dəfə qalib gəlmişdi. Hərçənd o, əvvəlcə namizədliyini irəli sürməyəcəyini açıqlamışdı. Çünki “Qaziantep” hazırda maddi cəhətdən çox çətin durumdadı. Şəhərin önəmli iş adamları faktiki kluba yaxın durmur. Anteplilər hətta 3 xal cəzası almaq təhlükəsi ilə üzləşmişdilər. Amma vergi borcu ödənildiyindən son anda cəzadan qurtulmaq mümkün oldu. Buna baxmayaraq, klubda son 3 ayda futbolçulara məvacib ödənilməyib! Komandanın son 13 turda cəmi 1 qələbəsinin olmasını da bununla əsaslandırmaq olar. Vəziyyətin düzəlmədiyini və tək qaldığını görən Akınal 3 həftə öncə seçkilərdə qalib gəlməsinə baxmayaraq, çıxış yolunu istefa verməkdə gördü. Elə baş məşqçi Erol Bulutun aqibəti də bəlli deyil. Çox güman, “Fənər”lə oyunun ardında komandada ciddi dəyişikliklər baş verəcək.