Yaxın keçmişin tanınmış türkiyəli futbolçularından olan Mehmet Topaldan xəbər var.

“Football-plus.az” xəbər verir ki, “Qalatasaray”, “Valensiya”, “Fənərbaxça”, “İstanbul BŞ” və son olaraq “Beşiktaş”da forma geymiş 38 yaşlı Topal 2022-nin yayında karyerasını bitirdiyini açıqlamışdı. Məşqçiliyə addım atmaq istəyən və A lisenziyasına sahib çıxan Topalın ilk klubunun adına aydınlıq gəlib. O, Rumıniyanın köklü klublarından olan “Petrolul”un başına keçmək üzrədi. Heç bir təcrübəsi olmayan bir məşqçinin birdən-birə Rumıniyanın elita təmsilçisinin başına keçməsi ilk baxışdan təəccüblü görünür. Amma bir məqamı qeyd edək ki, Ploeşti şəhərini təmsil edən “Petrolul” türkiəyli iş adamlarının – Sərhan Çətinsaya ilə Sərtac Güvənin tabeçiliyinə keçib. Rumıniyanın “Sports Digital” nəşrinin yazdığına inansaq, türkiyəlilər klubun səhmlərinin böyük hissəsini ələ keçirilib. 34 yaşlı Çətinsaya bir müddət öncə “Beşiktaş”da vitse-prezident kimi çalışırdı. Təxminən bir il bu vəzifəni icra etdikdən sonra ötən ilin avqustunda Serxio Ramosa görə onun “ağ-qaralar”ın o dönəmdəki başqanı Ahmet Nur Çəbi ilə münasibətləri pozuldu. Çətinsaya Ramosu Türkiyəyə gətirmək üçün dəridən-qabıqdan çıxmış, hətta onunla təkbətək görüşmüşdü. Amma Çəbi bu transferə qarşı çıxınca Çətinsaya istefa vermişdi. Ötən ilin sonlarından isə onun Rumıniya klublarından birini satın alacağı ilə bağlı şayiələr yayılmışdı. Çətinsaya uzun müddət Kluj “Universitatya”sının rəhbərliyi ilə danışqılar aparsa da, istəyinə çata bilməmişdi. Amma onun “Petrolul”u almaq cəhdləri bəhrə verdi. Sərtac Güvən isə daha öncə “Trabzonspor”da başqan yardımcısı kimi çalışıb və 2021-in dekabrında klubdan ayrılıb. “Petrolul” 2023/24-də Rumıniya çempionatının müntəzəm mövsümünü 10-cu pillədə başa vurmuşdu. Klubun prezidenti Klaudio Tudor, baş məşqçisi isə Laslo Balint idi. Hər halda, son günlərə qədər məhz belə idi. Amma klubda baş verən dəyişiklilərlə bağlı onların heç biri Rumıniya mətbuatına açıqlama vermək istəməyib. Balint qeyd edib ki, istefaya göndərilməsi ilə bağlı rəhbərlikdən heç kim onunla əlaqə saxlamayıb. Topalın “2+1” illik müqaviləyə imza atacağı və bazar günü “Petrolul”un yeni baş məşqçisi kimi ictimaiyyətə təqdim olunacağı gözlənilir. Onun köməkçilərindən 4-ü türk, 2-si rumıniyalı olacaq. 100 il öncə - 1924-də qurulan və sonuncusu 1966-da olmaqla 4 dəfə ölkə çempionu olan “Petrolul” yeni mövsümdə avrokuboklara vəsiqə qazanmaq istəyir. Topalın yeni klubuna bir neçə türkiyəli futbolçu cəlb edəcəyi də gözlənilir.