''Qalatasaray''ın bu yay üçün əsas transfer hədəfi olan Can Uzunla bağlı yeni məqamlar var. Daha doğrusu, Türkiyə çempionunun bu futbolçu üçün Frankfurt ''Ayntraxt''ına irəli sürdüyü təklifin detalları bəlli olub.

Son olaraq Türkiyənin Şimali Makedoniyanı 4:0 məğlub etdiyi yoxlama matçında 1 qol, 1 məhsuldar ötürməlik diqqətçəkən performans sərgiləyən istedadlı oyunçu özü də vətənə qayıtmağa razıdı. Okan Buruk israrla rəhbərlikdən bu futbolçunun transferini tələb edir. Həm universallığı, həm də gələn mövsüm Türkiyədə tətbiq olunacaq legioner limiti üzündən çox dəyərli duruma gələn Can üçün ''Qalatasaray'' ''Ayntraxt''a bonuslarla birlikdə 30 milyon avro təklif edib!

Almanlar belə desək, ''bazarlığa'' 60 milyon avrodan başlayıblar. Sonra 50 milyon avroya eniblər. Yəni hazırda təkliflə tələb arasında 20 milyon avroluq fərq var. Türkiyə yığması ilə mundiala yollanan futbolçular arasında yer alan Canın meneceri də ''Ayntraxt'' rəhbərliyinə məbləğin aşağı endirilməsi üçün təzyiq göstərir. İstanbul nəhəngi şərtləri bir qədər də yaxşılaşdıraraq ''Ayntraxt''a sonrakı satışdan pay da təklif edə bilər. Amma ''sarı-qırmızılar'' hazırda 30 milyon avrodan yuxarı məbləğ ödəmək niyyətində deyillər.

Parlaq gələcək vəd edən 20 yaşlı yarımmüdafiəçi geridə qoyduğumuz mövsümdə 28 rəsmi oyunda iştirak edərək aktivinə 10 qol, 6 məhsuldar ötürmə yazıb.