Məlum olduğu kimi Andre Onananın Türkiyə macərası başa çatdı. ''Trabzonspor''la icarəsi bitdiyi üçün təcrübəli qapıçı müqavilə ilə məxsus olduğu ''Mançester Yunayted''ə dönməli olub.

Kamerunlu qapıçı ''Yunayted''in Maykl Karrikin başçılığı altında yeni mövsümə hazırlıq çərçivəsində keçirəcəyi məşqlərdə və toplanışlarda iştirak edəcək. Amma məlum olub ki, ''Trabzonspor'' 30 yaşlı qapıçını daha bir il heyətdə saxlamaq istəyir. ''Yunayted'' Onananı 20 milyon avrodan aşağı məbləğə satmağı planlaşdırmır.

''Trabzonspor'' bir il öncə əsas qapıçısı Uğurcan Çakırı ''Qalatasaray''a 33+3 milyon avroya satsa da, qapı üçün bu boyda məbləğ xərcləmək istəmir. Ona görə iddialara inansaq, qaradənizlilər Onananın daha bir illik icarəsi üçün ingilislərə təklif irəli sürməyə hazırlaşır. Klub rəsmiləri artıq bununla bağlı Onananın menecerini də məlumatlandırıblar.

Qeyd edək ki, tanınmış qapıçı Türkiyə macərasını ölkə kubokunu qazanmaqla başa vurdu və 33 rəsmi oyunun 6-da qapısını toxunulmaz saxlayaraq 40 qol buraxdı.