"Fənərbaxça''lı Oğuz Aydının sürpriz yüksəlişi davam edir.

Kayseri səfərində 2 qol vuran 24 yaşlı vinger dünən ''Qaziantep''lə oyunda (3:1) da aktivinə 1 qol yazdı. Halbuki Oğuz ilk həftələrdə ümumiyətlə şans qazanmırdı. O, zəif performansı üzündən hətta adı avrokubokların iştirak ərizəsinə də salınmadı. Bu üzdən Oğuz avrokubok matçlarında oynaya bilmir. Amma həvəsdən düşməyən istedadlı futbolçu əzmkarlığının və üzərində çalışmasının qarşılığını almağa başlayıb.

Bu arada Oğuz Aydınla bağlı daha bir fakt diqqət çəkir. O, 3-ü ''Fənər''də, 11-i ''Alanyaspor''da olmaqla 2024-cü ildə superliqada 14 qol vurub. Yəni Aydın bu təqvim ilində Türkiyə çempionatının ən məhsuldar yerli futbolçusudu! Onu 11 qolla ''Qalatasaray''lı Barış Alpər Yılmaz və ''Beşiktaş''lı Semih Kılıçsoy təqib edir. Yay transfer dönəminin son günündə ''Qalatasaray''dan ''Benfika''ya yollanan Kərəm Aktürkoğlu isə 9 qolla 4-cü pillədə qərarlaşıb. Xatırladaq ki, Oğuz Aydın ötən mövsüm ''Alanyaspor''un heyətində sərgilədiyi oyunla diqqəti cəlb edərək Avropa klublarından da təkliflər almışdı. Amma o, Mourinyonun başçılığı altında oynamaq istədiyi üçün ''Ayaks'' və ''Renn''in təkliflərini geri çevirmişdi.

ƏLİ