İyulun 11-dən 12-nə keçən gecə Las-Veqasda təşkil olunan UFC 329 turnirinin ən önəmli döyüşündə Konor Makqreqorla Maks Hollouey qarşılaşdı.

"Football-plus.az" xəbər verir ki, 37 yaşlı irlandiyalı döyüş başlayan kimi dəlicəsinə amerikalı rəqibin üzərinə şığıdı. Konor tullanaraq ayağı ilə Maksa zərbə vurmağa çalışsa da, yerə düşərkən ayağını zədələdi. Ardından bir neçə zərbəni buraxan Makqreqor oktaqona yıxıldı. Nəticədə hakimlər cəmi 69 saniyə çəkən döyüşü dayandırdı. Makqreqora texniki nokautla uduzdu.

Hollouey bu döyüşdə qalib gəlməklə həm də 13 il əvvəlki qarşılaşmanın qisasını aldı. Xatırladaq ki, 2013-ün avqustunda Makqreqor hakimlərin yekdil qərarı ilə qalib elan olunmuşdu. Beləliklə, Konor 5 ildən sonra oktaqona qayıtdı və yenə məğlubiyyətlə barışdı. O, sonuncu dəfə 2021-ci ilin iyulunda Dastin Poryeyə uduzmuşdu. Elə həmin ilin yanvarında da Porye ilə bacarmamışdı. Ardıcıl 3-cü dəfə uduzan Konor peşəkar rinqdə keçirdiyi 29 döyüşün 7-də məğlub olub, 22-də qalib gəlib.

UFC prezidenti Dana Uayt Konorun zədəsi haqda danışıb: “Ən azı birinci raundda müharibə gözləyirdim. Güman edirik ki, Konorun ön xaçvari bağları qırılıb. Həkimlər də belə düşünür”.

Makqreqor özü də başına gələn hadisədən danışıb: “Döyüşdən əvvəl heç bir zədəm yox idi. Bütün toplanış boyunca çox sakit şəkildə ayağımla zərbə vurur, tullanırdım. Bu hadisə gözlənilmədən baş verdi. İndi qeyri-adi dərəcədə ağır vəziyyətdəyəm. Durumumu təsvir etmək üçün işlədə biləcəyim yeganə söz “cəhənnəm”di. Bu döyüşə o qədər yaxşı hazırlaşmışdım ki, başverənlərə inana bilmirəm. Oktaqona zədəli halda çıxdığım haqda deyilənlər tam boşboğazlıqdı. Sakit, hazır idim, özümə inanırdım. Başverənlərə görə şokdayam. Sanki şeytan birbaşa üzümə baxıt. Ancaq mən heç nəyə fikir vermirəm. Sabah kilsəyə gedəcəm. Bu maneəni də arxada qoyacam, məni dayandırmaq mümkün deyil, qayıdacam”.

Konorun cəmi 69 saniyə davam edən döyüşə görə nə qədər pul qazanması da hamını maraqlandırır. İnsayder Ariel Helvaninin yaydığı xəbərə görə, o, baza qonorarı kimi 15,04 milyon dollar alacaq. Sırf döyüşün özünə görə isə 5,08 milyon dollar ödəniş nəzərdə tutulur. Bir sözlə, cəmi bir dəqiqə oktaqonda atlanıb-düşən Konor 20 milyon dollar qazandı. Əcəb biznesdi!