Martın 22-də Macarıstan və martın 26-da Avstriya ilə yoxlama oyunu keçirəcək Türkiyə yığmasının heyətində dəyişiklik edilib.

''Fənərbaxça''nın iki ulduz futbolçusu Cengiz Ündər ilə Fərdi Kadıoğlunun adı zədə üzündən heyətdən çıxarılıb. Sağ ayaq əzələsində ağrılar olan Cengiz son turda ''Trabzonspor''a qarşı bütün oyunu ehtiyat oyunçular skamyasında keçirmişdi. Fərdi isə sözügedən qarşılaşmada 90 dəqiqə meydanda oldu. Amma həmin ağır oyundan sonra onun sağ ayağının baldır hissəsində ağrılar başlayıb. Bu üzdən yığmanın məşqçilər korpusu riskə getmək istəməyib. ''Ay-ulduzlular''ın baş məşqçisi Vinçentso Montella bu iki futbolçunun əvəzinə heyətə Rıdvan Yılmaz və Oğuz Aydını daxil edib.

Karyerasını ''Reyncers''də davam etdirən Rıdvan Yılmaz ara-sıra yığmaya dəvət alsa da, sonuncu dəfə 2021-ci ildə millinin formasında meydana çıxıb. Bu mövsüm ''Alanyaspor''un heyətində diqqət çəkməyi bacaran, superliqanın son 5 turunda 5 qol vuran Oğuz Aydın Niderlandda doğulsa da, ''Bucaspor''un yetirməsidi. 23 yaşlı vinger buna qədər bir neçə dəfə Türkiyənin aşağı yaş qruplarından ibarət komandalarında oynasa da, əsas yığmaya ilk dəfə dəvət alıb.

Bununla da Montellanın açıqladığı bu dəfəki heyətdə debütantların sayı 4-ə yüksəlib. Belə ki, adı bu dəfəki siyahıda olan Can Uzun, Semih Kılıçsoy və Ahmetcan Kaplan da ilk dəfə yığmaya çağırılıb.

ƏLİ