Türkiyə çempionatının 4-cü turunda ''Qalatasaray'' ''Adana Dəmirspor''un qonağı oldu.

''Yanq Boyz''a hər iki oyunda uduzmaqla fanatlarına böyük üzüntü yaşadan son çempion superliqada hələ ki, yoluna itkisiz davam edir. İlk 2 turda maksimum nəticə qazanan, 3-cü turdakı oyunu təxirə salınan Okan Burukun komandası Adana səfərində 5:1 hesablı inamlı qələbə qazandı.

Kərəm Aktürkoğlu, Barış Alpər Yılmaz, Mertens və Əbdülkərim Bardakcı hərəyə bir qol vurdusa, daha bir top meydan sahiblərinin müdafiəçisi Semih Gülərin avtoqolu sayəsində vuruldu. Hər iki qapıçının bu oyunda bir penalti dəf etdiyini də bildirək. ''Adana Dəmirspor''un qapıçısı Dəniz Dönmezər 15 yaş 345 günlüyündə bunu bacararaq Türkiyə çempionatı tarixində penalti dəf edən ən gənc qapıçıya çevrildi.

''Qalatasaray''ın 2018/19-dan bu yana ilk dəfə superliqada mövsümə ardıcıl 3 qələbə ilə başladığını bildirək. Bundan başqa ''Cim-Bom'' superliqa çərçivəsində səfərdə ardıcıl 11-ci qələbəsini qazanmaqla şəxsi rekordunu yenilədi.

ƏLİ