“Trabzonspor”u hələ ki bu yay Türkiyədə transfer dönəminin ən fəal klubu adlandırmaq olar.

"Football-plus.az" xəbər verir ki, yeni mövsümdə qardaş ölkəni Avropa Liqasında təmsil edəcək qaradənizlilər heyəti gücləndirməyə müvəffəq olub.

Transfer dönəminə “Beşiktaş”dan Ernest Muçini daimi əsasda heyətinə qatmaqla start verən Trabzon təmsilçisi Metehan Mimaroğlu, Samet Akaydın, Ruslan Malinovski, Melih Kabasakal, Sidni Lopeş Kabral, Noa Savyolo kimi isimləri transfer edib. Fatih Təkkənin çalışdırıdığı komanda indi də heyətini Türkiyə yığmasının üzvü ilə gücləndirib. Söhbət Aral Şimşirdən gedir. “Midtüllann”ın yetirməsi olan, bu klubda oyunu ilə diqqəti çəkən və uzun müddətdi İstanbul məhənglərinin də hədəfində olan 24 yaşlı vinger sonda “Trabzonspor”a qismət olub. Özü də bu transfer “bordo-mavililər”ə 13 milyon avroya başa gəlib. Bu, klub tarixinin yeni transfer rekordudu! Hərçənd bu məbləğ qarşı tərəfə 7 hissəyə bölünərək ödəniləcək. Aral Şimşirlə dördillik müqavilə imzalanıb. Onun Türkiyədə illik qazancı 2 milyon avroya bərabər olacaq. İstedadlı futbolçunun sonrakı satışından əldə olunacaq məbləğin 15 faizi də “Midtüllann”a çatacaq.

Aral Şimşir geridə qoyduğumuz mövsümdə 52 rəsmi oyunda iştirak edib. 12 qol, 21 məhsuldar ötürməlik diqqətçəkən performans sərgiləyərək karyerasının ən yaxşı dönəmini keçirib. O, Türkiyə yığmasına da dəvət olunur. DÇ ərəfəsində Şimali Makedoniya ilə yoxlama oyununda meydana çıxmaqla “ay-ulduzlular”ın heyətində debüt edib. Aral Şimşir DÇ üçün seçilmiş 35 nəfərlik geniş siyahıya düşsə də, yekun siyahıdan kənar qalaraq mundiala yollana bilmədi.

Yeri gəlmişkən, “Midtüllann” “Beşiktaş”ın AL-in 2-ci təsnifat mərhələsindəki rəqibidi. “Trabzonspor” Şimşiri heyətinə qatmaqla həm də “Beşiktaş”ın rəqibini zəiflətmiş oldu.