Çox bərbad bir mövsüm keçirən ''Trabzonspor''un qış transfer dönəmində fəal olacağı gözlənilir.

Güclənməyə ehtiyac duyan əsas mövqe müdafiənin mərkəzidi. Stefano Densvilin əsas komandadan kənarlaşdırılması və bu yay böyük ümidlərlə transfer edilən Stefan Saviçin zədələrdən başının açılmaması üzündən trabzonlular təcili mərkəz müdafiəçisi axtarışına başlayıblar. Əsas hədəf Macarıstan təmsilçisi ''Debretsen''də forma geyən 191 sm boya malik Meldin Dreşkoviçdi.

Ötən mövsüm Macarıstan çempionatının ən yaxşı müdafiəçisi seçilən Dreşkoviç də Saviç kimi monteneqroludu. Yayda bu futbolçunun adı ''Fənərbaxça'' ilə də yanaşı hallanmışdı. Monteneqro yığmasına da dəvət alan 26 yaşlı futbolçunun ''Debretsen'' ilə müqavilə müddəti gələn yay başa çatacaq. Onu bu qış Türkiyəyə gəlməyə razı salmaq üçün Saviçin də köməyindən istifadə olunacaq. Saviçin özünə gəlincə uzun illər ''Atletiko''da top qovduqdan sonra ''Trabzonspor''a gələn 33 yaşlı futbolçu zədələr üzündən bu mövsüm superliqada cəmi 3 qarşılaşmada forma geyib. Özü də son 9 matçda iştirak etməyən təcrübəli oyunçunun nə vaxt oynamağa hazır olacağı barədə də dəqiq məlumat yoxdu.

Maraq üçün bildirək ki, Saviçin maaşı 2,5 milyon avrodu və onunla üçillik müqavilə imzalanıb. Bu yay Trabzona azad agent statusunda gəldiyi üçün ona həm də 500 min avro imza parası ödənilmişdi.

ƏLİ