Futbol dünyası artıq bir neçə gündü bu hadisəyə görə məyusluq yaşayır. Fakt budu ki, Cənubi Afrika yığmasının və “Mamelodi Sandaunz”un yarımmüdafiəçisi Ceyden Adams 25 yaşında dünyasını dəyişib...

Football-plus.az" xəbər verir ki, bu bəd xəbəri ilk dəfə ictimaiyyətə futbolçunun mentoru açıqlayıb. İlkin xəbərlərdə Ceydenin ölüm səbəbi ilə bağlı maraqlı məlumata rast gəlinib. Bəzi KİV-də futbolçunun depressiyada olduğu və intihar etdiyi iddia olunsa da, onun mentoru bu məlumatı təkzib edib: “Bu itki hamını sarsıtdı. Dünya çempionatından yenicə qayıtmışdıq və belə bir xəbər aldıq. Cümə axşamı onunla danışmışdıq. O, dünya çempionatından sonra meydana qayıtmağa və yenidən oynamağa köklənmişdi. Hazırda Ceydenlə bağlı söz tapmaq çətindi. Ailənin şəxsi həyatına hörmətlə yanaşılmasını xahiş edirik. Bəli, onun vəfat etdiyini təsdiqləyə bilərəm. Bunu heç kim gözləmirdi...”

Qeyd edək ki, Adams DÇ-2026-da Cənubi Afrika yığmasının heyətində qrup mərhələsinin 3 oyununda iştirak etmişdi. 1/16 finalın Kanada ilə oyununu (0:1) kənardan izləyən yarımmüdafiəçi milli komandada keçirdiyi 9 oyunda 1 qol vurub. Klub karyerası ərzində isə “Mamelodi Sandaunz” və “Stellenbos”un formasını geyib.

Son xəbərlərdə Ceydenin ölümünün intiharla bağlı olduğu vurğulanır. Məsələn, tanınmış yerli jurnalist Nuhu Adams sosial şəbəkələrdəki hesablarında bu versiyanı təsdiqləyib. Yerli polis ölüm faktıyla bağlı təhqiqatı davam etdirir.